Boks bo‘yicha super o‘rta vazn toifasida WBC va WBA chempionlik kamarlari sohibi Saul “Kanelo” Alvares (54-1-2, 36 KO) navbatdagi jangini Avni Yildirimga (21-2-0, 12 KO) qarshi o‘tkazishi mumkin.
The Athletic jurnalisti Mayk Koppinjerning xabar qilishicha, Kanelo Matchroom Boxing bilan kelishuv imzolagan va 27-fevral kuni super o‘rta vazn kamarini himoya qilish uchun Avni Yildirimga qarshi jang qiladi. Jang Mayamidagi Hard Rock stadionida bo‘lib o‘tadi.
Avvalroq promouter Eddi Hirn Alvares keyingi jangini Billi Jo Sondersga qarshi o‘tkazishi mumkinligini ma’lum qilgandi.
Meksikalik bokschi 20-dekabrda super o‘rta vaznda WBA chempioni Kallum Smitni (27-1, 19 KO) mag‘lubiyatga uchratib, undan kamarni tortib olgandi. Keyinchalik Kanelo o‘rta vaznning WBA kamaridan voz kechdi.
Eslatib o‘tamiz, Alvares 2020-yilning noyabr oyida Oskar de la Hoya rahbarligidagi Golden Boy promouterlik kompaniyasi bilan shartnomani bekor qilgandi. Keyinchalik bokschi Golden Boy va DAZN kompaniyalarini sudga bergan hamda ularda 280 million dollar kompensatsiya talab qilayotgani xabar qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)