Viloyat hokimi Shavkatjon Abdurazzaqovning Isroilning DRTS (Drip Research Technology Solutions) kompaniyasi mintaqaviy vakili Sulaymon Xartavio‘g‘li bilan muloqotida shu haqda so‘z bordi. Bu haqda “Daryo”ga viloyat hokimligi axborot xizmati ma’lum qildi.
DRTS tomchilatib sug‘orish va agrotexnologiyalar bo‘yicha dunyodagi yetakchi kompaniya bo‘lib, AQSh, Turkiya va Hindistonda filiallariga ega. Hozirda kompaniya tomonidan Toshkent viloyatining Yuqori Chirchiq tumanida 40 gektar maydonda lavanda plantatsiyasi barpo etilmoqda.
Sulaymon Xartavio‘g‘li shunday plantatsiyani Namangan viloyatida ham joylashtirishni taklif qildi.
—Lavanda koni foyda o‘simlik. Tibbiyot va parfyumeriyada keng qo‘llaniladi, suvi, guli va moyidan foydalanish, eksportga yo‘naltirish mumkin. Kilogrammi jahon bozorida 8-9 ming dollar baholanadi, bir gektardan esa 70-80 kilogramm moy olish mumkin. Eng asosiysi, lavanda ko‘p suv va parvarish talab qilmaydi, O‘zbekiston sharoiti uchun juda qulay, — dedi Sulaymon Xartavio‘g‘li.
Viloyat hokimi 2018-yilda Turkiyaning atirgullar va lavandalar o‘lkasi hisoblangan Ispartaga safar qilgani va o‘zaro yaqin aloqalar o‘rnatilganini eslab o‘tarkan, mazkur tashabbusni qo‘llab-quvvatladi. Buning uchun “Kosonsoy-farm” EIZ hududi bilan tanishishni taklif qilib, bu yerda plantatsiyalar tashkil etish va ishlab chiqarishni yo‘lga qo‘yish uchun barcha sharoitlar yaratilganini ta’kidladi.
Izoh (0)