Вилоят ҳокими Шавкатжон Абдураззақовнинг Исроилнинг DRTS (Drip Research Technology Solutions) компанияси минтақавий вакили Сулаймон Хартавиўғли билан мулоқотида шу ҳақда сўз борди. Бу ҳақда «Дарё»га вилоят ҳокимлиги ахборот хизмати маълум қилди.
DRTS томчилатиб суғориш ва агротехнологиялар бўйича дунёдаги етакчи компания бўлиб, АҚШ, Туркия ва Ҳиндистонда филиалларига эга. Ҳозирда компания томонидан Тошкент вилоятининг Юқори Чирчиқ туманида 40 гектар майдонда лаванда плантацияси барпо этилмоқда.
Сулаймон Хартавиўғли шундай плантацияни Наманган вилоятида ҳам жойлаштиришни таклиф қилди.
—Лаванда кони фойда ўсимлик. Тиббиёт ва парфюмерияда кенг қўлланилади, суви, гули ва мойидан фойдаланиш, экспортга йўналтириш мумкин. Килограмми жаҳон бозорида 8-9 минг доллар баҳоланади, бир гектардан эса 70-80 килограмм мой олиш мумкин. Энг асосийси, лаванда кўп сув ва парвариш талаб қилмайди, Ўзбекистон шароити учун жуда қулай, — деди Сулаймон Хартавиўғли.
Вилоят ҳокими 2018 йилда Туркиянинг атиргуллар ва лавандалар ўлкаси ҳисобланган Испартага сафар қилгани ва ўзаро яқин алоқалар ўрнатилганини эслаб ўтаркан, мазкур ташаббусни қўллаб-қувватлади. Бунинг учун «Косонсой-фарм» ЭИЗ ҳудуди билан танишишни таклиф қилиб, бу ерда плантациялар ташкил этиш ва ишлаб чиқаришни йўлга қўйиш учун барча шароитлар яратилганини таъкидлади.
Изоҳ (0)