Shavkat Mirziyoyev Buxoroga tashrifini shamoldan zarar ko‘rgan Olot tumanidan boshladi

Qayd etilishicha, bu hududlar iqtisodiyotini rivojlantirishga qaratilgan 2021-yilgi birinchi tashri bo‘lib, u mazkur chekka tumandan boshlanayotgani bejiz emas.

2020-yil 27-aprel kuni Buxoro viloyatiga janubdan kuchli shamol kirib kelgan edi. Uy-joylar, infratuzilma va ekinlarga katta zarar yetgandi.

Davlat rahbari zudlik bilan u yerga yetib borib, tabiiy ofat oqibatlarini bartaraf qilish, turar joylar va ijtimoiy obyektlarni ta’mirlash bo‘yicha topshiriqlar bergan edi. Qisqa muddatda zarur ishlar bajarilib, hayot o‘z maromiga qaytdi.

Bu galgi safar chog‘ida Prezident vertolyotda ushbu ishlar qamrovini ko‘zdan kechirdi.

Xususan, Olot, Qorako‘l, Jondor, Romitan, Peshku va Shofirkon tumanlarida 45 mingta uy, 204 ta ko‘p qavatli turar joy ta’mirlangan. Mingdan ortiq ijtimoiy soha va tadbirkorlik obyektlari, yo‘llar, elektr, gaz va aloqa tarmoqlari tiklangan.

Prezident shu yerlik aholi bilan muloqot qildi.