Toshkent markazida Hampton by Hilton mehmonxonasi qurilmoqda, deb xabar beradi Spot. Ushbu ma’lumotni nashrga poytaxt hokimligi matbuot xizmati tasdiqlagan.
Hampton by Hilton — Amerikaning Hilton mehmonxonalar tarmog‘i brendi. Bu o‘rtacha narxlarga ega o‘rta darajadagi mehmonxonalar hisoblanadi. Ularning aksariyati xususiy franchayzilarda joylashgan, ayrimlari kompaniyaning o‘zini boshqaruvida. 2021-yilning yanvar ma’lumotiga ko‘ra, butun dunyo bo‘ylab 2731 ta mehmonxona mavjud.
Mehmonxona endi qurilayotganiga qaramay, unga oid ma’lumot “Yandek.Xarita”da paydo bo‘lgan. Obyekt Istiqbol ko‘chasida, KFC restorani yonida, Xalqaro Vestminister universiteti ro‘parasida joylashgan.
Loyiha buyurtmachisi Asia Star Plaza kompaniyasi. Korxonalar va tashkilotlarning yagona davlat registri ma’lumotlariga ko‘ra, kompaniya 2020-yilning 29-yanvarida poytaxtning Yashnobod tumanida ro‘yxatga olingan. Yo‘nalishi — mehmonxonalar va muqobil turar joylar.
Ta’sischilar sifatida Nazimjon Usmonov (50 foiz) va Baxtiyor Qoraxo‘jayev (50 foiz) ko‘rsatilgan. Qoraxo‘jayev, shuningdek, mehmonxona rahbari hisoblanadi.
Baxtiyor Qoraxo‘jayev, ochiq ma’lumotlarga ko‘ra, mehmonxona ishida tajribaga ega hisoblanadi. U 2018-yilning iyunida ro‘yxatdan o‘tgan Poytaxt Tower kompaniyasning (Citizen Hotel mehmonxonasi, Sky Lounge restorani) 100 foiz ulushiga egalik qiladi. Shuningdek, u Toshkent viloyatidagi Wellmore Resort va poytaxtdagi Hilal Hotel mehmonxonalarini boshqaruvchi Citizen Travel kompaniyasining 37,3 foiz ulushiga egalik qiladi.
Nazimjon Usmonov umumiy ovqatlanish sohasida tajribaga ega. U International Foodchain (KFC’ni boshqaruvchi)ning 46 foiz ulushiga, shuningdek, Food Grand (oziq-ovqat mahsulotlarining ulgurji savdosi, jumladan, baliq, qisqichbaqasimonlar va mollyuskalar) kompaniyasning 35 foiziga egalik qiladi.
Toshkentda Hampton by Hilton’ning ochilishi to‘g‘risida birinchi bor 2020-yilning martida ma’lum bo‘lgandi. O‘shanda NRG (Murad Buildings va Qozog‘istonning BI Group qo‘shma loyihasi) qurilish kompaniyasi ushbu mehmonxonani qurishni rejalashtirayotgani aytilgandi.
Izoh (0)