Alibaba asoschisi Jek Ma qariyb uch oy deganda ilk bor ommaga ko‘rinish berdi, deb xabar bermoqda “RBK” The Wall Street Journal’ga tayanib.
20-yanvar kuni u Xitoy qishloq o‘qituvchilarini qo‘llab-quvvatlashga bag‘ishlangan onlayn tadbirda video-aloqa orqali chiqish qilgan. Ushbu ma’lumotni gazetaga biznesmen fondi va (Alibaba’ga qarashli) Ant Group kompaniyasi vakillari tasdiqlagan.
Jek Ma chiqishini Xitoyning Global Times davlat gazetasi jurnalisti o‘zining Twitter’dagi sahifasida e’lon qilgan. Unda milliarder xitoylik o‘qituvchilar va ta’lim tizimini qo‘llab-quvvatlashga chaqirgan.
“Men va hamkasblarim o‘qidik va o‘zimizni ta’lim sohasida xayriya ishlariga bag‘ishlash uchun qat’iyroq bo‘ldik degan qarorga keldik”, — deya murojaat qilgan Jek Ma pedagoglarga. Shuningdek, odatda marosim Xitoy janubidagi Sanya kurort shahrida o‘tkazilishini, ammo bu yil pandemiya sabab uni onlayn o‘tkazishga to‘g‘ri kelganini aytib o‘tgan.
Xabarda aytilishicha, Jek Maning chiqish qilgani haqidagi xabarlar fonida Alibaba aksiyalari Gonkong birjasida 6 foizga o‘sgan.
Alibaba asoschisi jamoatchilik oldida so‘nggi marta 2020-yilning 24-oktabrida ko‘rinish bergandi. O‘shanda Shanxayda o‘tkazilgan anjumanda Ma xalqaro moliyaviy tartibga solish normalarini eskirgan deb atab, Xitoy hukumatini moliyaviy industriyada innovatsiyalarda yo‘l bermayotganlikda tanqid qilgandi.
Sobiq ingliz tili o‘qituvchisi Jek Ma 1999-yili Alibaba’ga asos solgan va 2019-yilda kompaniya rahbarligidan ketgan. U hozirda kapitalizatsiyasi 645 milliard dollarga teng Xitoydagi eng yirik ikkinchi kompaniya. Yaqin kunlargacha Ma Xitoyning eng badavlat insoni edi, biroq so‘nggi ikki oy ichida Alibaba aksiyalari narxining tushib ketishi uning boyligini 11 milliard dollarga kamayishiga sababchi bo‘ldi.
Izoh (0)