CNBC telekanali Alibaba asoschisi milliarder Jek Ma o‘zining Xanchjouda joylashgan shtab-kvartirasida qasddan yashiringani haqida xabar berganidan keyin kompaniya aksiyalari narxi 5 foizga ko‘tarildi. Bu haqda Forbes xabar bermoqda.
Foto: Twitter / AlibabaGroup
Alibaba asoschisi g‘oyib bo‘lmagani, balki kompaniyaning Xanchjoudagi shtab-kvartirasida ekani haqida CNBC telekanali boshlovchisi Devid Faber ma’lum qilgan.
“U katta ehtimol bilan Alibaba shtab-kvartirasi joylashgan Xanchjouda ekani va atayin yashiringanini aytishim mumkin. Lekin bu uning yo‘qolganini anglatmaydi”, — degan Faber.
4-yanvar kuni Jek Ma ikki oydan beri jamoatchilik oldida ko‘rinish bermagani va hakamlar hay’ati a’zosi sifatida qatnashishi kerak bo‘lgan biznes-teleko‘rsatuvda to‘satdan ishtirok etmay, o‘rniga boshqa odam tayinlanishi haqidagi xabarlar fonida Alibaba bozor kapitalizatsiyasida 3 foiz ulushini yo‘qotdi.
Jek Maning Alibaba va Ant Group kompaniyalari oktabr oyida Xitoyning moliyaviy tartibga solish tizimini tanqid qilganidan bir necha hafta o‘tgach, hukumat bosimi ostida qoldi. Shanxayda bo‘lib o‘tgan konferensiyada Ma xalqaro qoidalar “keksalar klubi” va “kelajakni tartibga solishning kechagi usullari” ekanini ta’kidlagan.
Uning fikricha, dunyodagi ko‘plab muammolar rivojlanish emas, faqat xavfning oldini olish muhokama qilingani uchun paydo bo‘ladi, yosh avlod va rivojlanayotgan davlat haqida esa o‘ylanmaydi.
Shundan so'ng Alibaba sho‘ba korxonasining rejalashtirilgan IPO’si bekor qilindi. Kompaniyaga nisbatan esa antimonopol tekshiruvi qo‘zg‘atildi.
Sobiq ingliz tili o‘qituvchisi Jek Ma 1999-yili Alibaba’ga asos solgan va 2019-yilda kompaniya rahbarligidan ketgan. U hozirda kapitalizatsiyasi 645 milliard dollarga teng Xitoydagi eng yirik ikkinchi kompaniya. Yaqin kunlargacha Ma Xitoyning eng badavlat insoni edi, biroq so‘nggi ikki oy ichida Alibaba aksiyalari narxining tushib ketishi uning boyligini 11 milliard dollarga kamayishiga sababchi bo‘ldi.
