Alibaba asoschisi Jek Ma ikki oydan buyon ommaga ko‘rinish bermadi. Bundan oldin u Xitoy banklarini tanqid qilgandi

Xitoydagi Alibaba internet do‘koni asoschisi, milliarder Jek Ma omma oldida ko‘rinish bermaganiga ikki oydan oshdi, uning hozirda qayerda ekanligi noma’lum, deb yozadi Meduza.

Financial Times’ning aniqlashicha, noyabrda Ma o‘z tomonidan asos solingan Africa’s Business Heroes tanlovining finaliga kelmagan. Ushbu tanlovda afrikalik yosh tadbirkorlar mukofot puli 1,5 million dollar bo‘lgan grantlar uchun bellashadi. Ma hakamlar hay’ati orasida o‘tirishi kerak bo‘lgan, biroq u shouning final epizodini suratga olish ishlarida qatnashmagan, uning ismi saytdagi hakamlar hay’ati ro‘yxatidan olib tashlangan. Alibaba’ning ma’lum qilishicha, Ma bandligi sabab tanlov finaliga bora olmagan.

Taiwan News nashrining yozishicha, Maning ijtimoiy tarmoqlardagi so‘nggi posti 17-dekabr sanasida qoldirilgan.

Oktabr oxirida Shanxayda o‘tkazilgan anjumanda Ma xalqaro moliyaviy tartibga solish normalarini eskirgan deb atab, Xitoy banklari “Lombard mentaliteti”ga rioya qilayotganliklarini ma’lum qilgandi. Bu Alibaba xoldingi tarkibiga kiruvchi va Xitoydagi eng yirik mobil to‘lovlar platformasini boshqarishga mo‘ljallangan Alipay’ga egalik qiluvchi Ant Group’ning birjaga chiqishidan biroz oldin sodir bo‘lgan. 5-noyabr kuni nazorat paketi Maga tegishli bo‘lgan Ant Group Shanxay va Gonkong birjalarida IPO’ni amalga oshirishi kerak edi. Bu tarixdagi eng yirik IPO’ga aylanib, kompaniya 34,4 milliard dollar jalb etishi kerak bo‘lgan.

Biroq birjaga chiqishdan ikki kun oldin Xitoy moliyaviy regulyatorlari Ma va Ant Group rahbarlarini suhbatga chaqirgan. Reuters manbasining so‘zlariga ko‘ra, ular bizneslarini to‘liq tekshiruv kutayotgani to‘g‘risida ogohlantirilgan. Ant Group IPO’si qoldirilgan — avvalroq Xitoy hukumati kompaniya top-menejerlariga bu borada qarshilik ko‘rsatmaslikka va’da bergan edi. Bundan tashqari, dekabr oyida Xitoy regulyatorlari Ant Group’ni shaffof raqobat prinsiplarini va iste’molchilar huquqlarini buzishda ayblagan. Maga mamlakatni tark etmaslik maslahat berilgan.

Maning ikki oydan buyon ko‘rinmay qolgani sabab Xitoyning WeChat ijtimoiy tarmog‘i foydalanuvchilari biznesmen Xitoydan qochib ketgani yoki uni “yo‘qolib qolishga majburlashgani”ni muhokama qilmoqda. Xitoydagi biznes-konsaltingga ixtisoslashgan BDA China kompaniyasi rahbari Dunkal Klark Reuters bilan suhbatda Ma hukumatning uning biznesiga e’tibori fonida “tinch yotgan” bo‘lishi mumkinligini taxmin qildi.

Sobiq ingliz tili o‘qituvchisi Jek Ma 1999-yili Alibaba’ga asos solgan va 2019-yilda kompaniya rahbarligidan ketgan. U hozirda kapitalizatsiyasi 645 milliard dollarga teng Xitoydagi eng yirik ikkinchi kompaniya. Yaqin kunlargacha Ma Xitoyning eng badavlat insoni edi, biroq so‘nggi ikki oy ichida Alibaba aksiyalari narxining tushib ketishi uning boyligini 11 milliard dollarga kamayishiga sababchi bo‘ldi.