Toshkentda muddati o‘tgan va iste’molga yaroqsiz mahsulotlarning yaroqlilik muddatini o‘zgartirib, yana savdoga kiritgan tadbirkorlar qo‘lga olindi. Bu haqda IIV JQBB Korrupsiya va iqtisodiy jinoyatlarga qarshi kurashish boshqarmasi matbuot xizmati xabar berdi.
Ma’lumotlarga ko‘ra, 14-yanvar kuni IIV JQBB Korrupsiya va iqtisodiy jinoyatlarga qarshi kurashish boshqarmasi xodimlari tomonidan Bosh prokuratura huzuridagi departament bilan hamkorlikda tezkor tadbir o‘tkazilgan. Natijada Toshkent shahar Yangihayot tumani Qo‘yliq-3 mavzesida joylashgan “Texno invest” MChJ bazasida ijarada bo‘lgan xususiy tadbirkorlar M.D. va A.D. iste’mol muddati o‘tib ketgan, iste’molga yaroqsiz Bliss, “Sochnaya dolina” sharbatlari, Marinelle tomat pastasi hamda “Moloko s saxarom” nomli quyultirilgan sut mahsulotlarining muddatlarini yangi sanaga o‘zgartirib, 25 million so‘mga sotgan vaqtlarida ashyoviy dalillar bilan ushlangan.
Shundan so‘ng ushbu baza hududidagi M.D. va A.D. tomonidan ijaraga olingan 2 ta omborxona ko‘zdan kechirilgan.
U yerda jami 2,477 milliard so‘mlik iste’mol muddati o‘tib ketgan, iste’molga yaroqsiz, muddatlari yangi sanaga qalbakilashtirilib o‘zgartirilgan Bliss, “Sochnaya dolina”, “Meva” sharbatlari, Coca-Cola, Fanta, Sprite ichimliklari aniqlangan. Bundan tashqari, omborlardan Marinelle nomli tomat pastasi, o‘simlik ikrasi, ananas, jo‘xori, assorti, qovoqchali ikra konservalari, “Derevenskaya”, “Moloko s saxarom” nomli quyultirilgan sut, American tea, Veston tea, Arab tea, “Toshkent choy” nomli quruq choy, Avangard nomli un mahsulotlari hamda tovarlarning yaroqlilik muddatlarini o‘chirishda foydalanilgan atseton suyuqliklari mavjudligi aniqlanib, ashyoviy dalil tariqasida olingan.
Ushbu holat yuzasidan tekshiruv ishlari olib borilmoqda.
Izoh (0)