Ichki ishlar vazirligi ijtimoiy tarmoqlarda “Chiroqchi va Mirishkor tumanlarida fuqarolar YPX xodimlari tomonidan kaltaklangan” mazmunda tarqalayotgan xabarlar yuzasidan ma’lumot berdi.
Ijtimoiy tarmoqlarda tarqalgan videoda ta’kidlanishicha, 17-yanvar kuni Qashqadaryo viloyati Chiroqchi tumanida H.U. ismli fuqaroni YPX xodimining ukasi kaltaklagan. Shuningdek, ushbu holatga uch nafar YPX xodimi guvohlik qilgan.
IIV axborot xizmati xabariga ko‘ra, holat bo‘yicha Ichki ishlar vazirligi O‘z xavfsizligi boshqarmasi Qashqadaryo viloyati bo‘yicha bo‘limi tomonidan tekshiruv olib borilmoqda.
Qayd etilishicha, tekshiruv yakunlariga ko‘ra, tomonlar xatti-harakatlariga huquqiy baho berilib, tegishli chora ko‘riladi va qo‘shimcha axborot beriladi.
“Ijtimoiy tarmoqlarning faollaridan tekshiruv yakuni bo‘yicha rasmiy ma’lumot berilgunga qadar noo‘rin mish-mishlarni tarqatmasliklarini so‘raymiz”, — deyiladi xabarda.
Avvalroq Qashqadaryoda fuqarolarni so‘kkani aytilayotgan YPX inspektoriga hayfsan berilgan, Toshkentda mast holda jamoat tartibini buzgan ichki ishlar organi xodimi lavozimidan ozod etilgan, Qashqadaryoda bodikamerasiz faoliyat yuritgan YPX xodimiga intizomiy chora ko‘rilgan edi.
Izoh (0)