Тошкентда муддати ўтган ичимликлар ва истеъмолга яроқсиз маҳсулотларни савдога чиқариш билан шуғулланиб келган тадбиркорлар ушланди

Тошкентда муддати ўтган ва истеъмолга яроқсиз маҳсулотларнинг яроқлилик муддатини ўзгартириб, яна савдога киритган тадбиркорлар қўлга олинди. Бу ҳақда ИИВ ЖҚББ Коррупция ва иқтисодий жиноятларга қарши курашиш бошқармаси матбуот хизмати хабар берди.

Маълумотларга кўра, 14 январь куни ИИВ ЖҚББ Коррупция ва иқтисодий жиноятларга қарши курашиш бошқармаси ходимлари томонидан Бош прокуратура ҳузуридаги департамент билан ҳамкорликда тезкор тадбир ўтказилган. Натижада Тошкент шаҳар Янгиҳаёт тумани Қўйлиқ-3 мавзесида жойлашган «Техно инвест» МЧЖ базасида ижарада бўлган хусусий тадбиркорлар М.Д. ва А.Д. истеъмол муддати ўтиб кетган, истеъмолга яроқсиз Bliss, «Сочная долина» шарбатлари, Marinelle томат пастаси ҳамда «Молоко с сахаром» номли қуюлтирилган сут маҳсулотларининг муддатларини янги санага ўзгартириб, 25 миллион сўмга сотган вақтларида ашёвий далиллар билан ушланган.

Шундан сўнг ушбу база ҳудудидаги М.Д. ва А.Д. томонидан ижарага олинган 2 та омборхона кўздан кечирилган.

У ерда жами 2,477 миллиард сўмлик истеъмол муддати ўтиб кетган, истеъмолга яроқсиз, муддатлари янги санага қалбакилаштирилиб ўзгартирилган Bliss, «Сочная долина», «Мева»  шарбатлари, Coca-Cola, Fanta, Sprite ичимликлари аниқланган. Бундан ташқари, омборлардан Marinelle номли томат пастаси, ўсимлик икраси, ананас, жўхори, ассорти, қовоқчали икра консервалари, «Деревенская», «Молоко с сахаром» номли қуюлтирилган сут, American tea, Veston tea, Arab tea, «Тошкент чой» номли қуруқ чой, Avangard номли ун маҳсулотлари ҳамда товарларнинг яроқлилик муддатларини ўчиришда фойдаланилган ацетон суюқликлари мавжудлиги аниқланиб, ашёвий далил тариқасида олинган.

Ушбу ҳолат юзасидан текширув ишлари олиб борилмоқда.