Farg‘ona viloyati Oltiariq tumanidagi “Ko‘mir ta’minot” MChJga qarashli ombor mudiri juda ko‘p miqdorda ko‘mirni talon-toroj qilgani aniqlandi. Bu haqda Bosh prokuratura “Daryo”ga ma’lum qildi.
Qayd etilishicha, Bosh prokuratura huzuridagi departamentning Oltiariq tuman bo‘limi tomonidan o‘tkazilgan tergovga qadar tekshiruv o‘tkazilgan.
Unda “Ko‘mir ta’minot” MChJga qarashli Oltiariq ko‘mir ombori sobiq mudiri M.M. o‘zining moddiy javobgarligida bo‘lgan umumiy qiymati 807,1 million so‘m bo‘lgan 1 566 tonna ko‘mir mahsulotlarini sotib yuborib, o‘zlashtirish yo‘li bilan talon-toroj qilganligi aniqlangan.
Mazkur holat yuzasidan M.M.ga nisbatan Jinoyat kodeksining 167-moddasi 3-qismi (juda ko‘p miqdorda o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqanddagi sog‘liqni saqlash muassasalari tomonidan 7 milliard so‘m budjet mablag‘lari talon-toroj qilingani, Samarqandda gazga noqonuniy ulanib, davlatga 360 mln so‘m zarar yetkazgan fuqarolarga jinoiy ish qo‘zg‘atilgani hamda Ohangaronda fermer xo‘jaligiga bostirib kirib, ishchilar mulkini talon-toroj qilgan shaxslar hibsga olingani haqida xabar berilgandi.
Izoh (0)