MIB Andijon viloyat boshqarmasi Andijon shahar hokimligidan fuqaroning 325 million so‘mdan ortiq kompensatsiya pulini undirib berdi, deya xabar berdi “Daryo” muxbiri.
Ma’lum bo‘lishicha, fuqarolik ishlari bo‘yicha Andijon tumanlararo sudi 2020-yil 9-iyul kuni da’vogar Andijon shahar Adliya bo‘limining fuqaro I.J. manfaatini ko‘zlab bergan javobgar Andijon shahar hokimligidan buzilgan bino-inshoot uchun kompensatsiya pulini undirish haqidagi da’vo arizasini ko‘rib chiqqan. Sud ishni ko‘rib chiqib, javobgar Andijon shahar hokimligidan da’vogar I.J. foydasiga 325 million 532 ming 332 so‘m undirishni belgilagan.
Byuroning viloyat boshqarmasi axborot xizmati rahbari Oyista Abdurahmonovaning aytishicha, mazkur ijro hujjati MIB Andijon shahar bo‘limi ish yurituviga olingan bo‘lib, bo‘lim tomonidan undiruvni tashkil etish uchun ijro varaqalari va davlat ijrochisining ijro ishi qo‘zg‘atish haqidagi qarorlari shahar hokimligiga taqdim etilgan bo‘lsa-da, mahalliy budjetda ortiqcha mablag‘ yo‘qligi sababli ijrosi ta’minlanmay kelingan.
Fuqaro I.J.ning yo‘llagan murojaatiga asosan MIB viloyat boshqarmasi tomonidan ko‘rilgan chora-tadbirlar natijasida shahar hokimligidan fuqaroga 325 million 532 ming 332 so‘m naqd pul ko‘rinishida undirib berilishi ta’minlangan.
Izoh (0)