Ички ишлар вазирлиги ижтимоий тармоқларда «Чироқчи ва Миришкор туманларида фуқаролар ЙПХ ходимлари томонидан калтакланган» мазмунда тарқалаётган хабарлар юзасидан маълумот берди.
Ижтимоий тармоқларда тарқалган видеода таъкидланишича, 17 январь куни Қашқадарё вилояти Чироқчи туманида Ҳ.У. исмли фуқарони ЙПХ ходимининг укаси калтаклаган. Шунингдек, ушбу ҳолатга уч нафар ЙПХ ходими гувоҳлик қилган.
ИИВ ахборот хизмати хабарига кўра, ҳолат бўйича Ички ишлар вазирлиги Ўз хавфсизлиги бошқармаси Қашқадарё вилояти бўйича бўлими томонидан текширув олиб борилмоқда.
Қайд этилишича, текширув якунларига кўра, томонлар хатти-ҳаракатларига ҳуқуқий баҳо берилиб, тегишли чора кўрилади ва қўшимча ахборот берилади.
«Ижтимоий тармоқларнинг фаолларидан текширув якуни бўйича расмий маълумот берилгунга қадар ноўрин миш-мишларни тарқатмасликларини сўраймиз», — дейилади хабарда.
Аввалроқ Қашқадарёда фуқароларни сўккани айтилаётган ЙПХ инспекторига ҳайфсан берилган, Тошкентда маст ҳолда жамоат тартибини бузган ички ишлар органи ходими лавозимидан озод этилган, Қашқадарёда бодикамерасиз фаолият юритган ЙПХ ходимига интизомий чора кўрилган эди.
Изоҳ (0)