Xorazm viloyati hokimi o‘rinbosarining ukasiga tegishli kompaniya tenderda 20 milliard so‘mlik davlat buyurtmasini yutgani ma’lum bo‘lgandi. Korrupsiyaga qarshi kurashish agentligi Xorazm viloyati hokimligi yagona buyurtmachi injiniring kompaniyasi tomonidan 2020-yilda o‘tkazilgan tender savdosining “Davlat xaridlari to‘g‘risida”gi qonun va boshqa qonunosti hujjatlarga muvofiqligini o‘rgandi.
Xususan, Xorazm viloyati hokimining 2020-yil 21-fevraldagi 65-son qarori bilan tender komissiya tarkibi tasdiqlangan bo‘lib, komissiya raisi sifatida Xorazm viloyati hokimining kapital qurilish, kommunikatsiyalar, kommunal xo‘jalik va obodonlashtirish masalalari bo‘yicha o‘rinbosari B.Qurbanov, komissiya raisi o‘rinbosari sifatida Xorazm viloyati hokimligi huzuridagi yagona buyurtmachi injiniring kompaniyasi direktori Q.Rahimov belgilangan.
Viloyat hokimligi yagona buyurtmachi injiniring kompaniyasi tomonidan 7018648-sonli lot orqali o‘tkazilgan boshlang‘ich narxi 20 milliard 380 million 686 ming so‘m bo‘lgan “Urganch shahridagi perinatal markazni rekonstruksiya qilish” obyekti bo‘yicha “Bunyodkor” MChJ, “Urganch Qurilish Beton” MChJ va “Irdimzon Qurilish” xususiy korxonasi tomonidan ofertalar taqdim qilingan.
Mazkur lot raqami bo‘yicha o‘tkazilgan tender natijalari bo‘yicha 2020-yil 23-iyun kungi 4/131-sonli bayonnomaga ko‘ra, “Bunyodkor” MChJ 20 milliard 180 million 686 ming 966 so‘m taklif qilgan holda tender g‘olibi bo‘lib, 2020-yil 25-iyun kungi PM №1-2020 tartib raqamli pudrat shartnomasiga asosan, mazkur MChJ tomonidan perinatal markazni rekonstruksiya qilish ishlari olib borilmoqda.
Ushbu lot bo‘yicha o‘tkazilgan tender hujjatlari o‘rganilganda 2020-yil 11-iyun va 2020-yil 23-iyun kunlari o‘tkazilgan tender savdo yig‘ilishlarida komissiya raisi (B.Qurbanov) va uning o‘rinbosari (Q.Rahimov) aslida ishtirok etmagan bo‘lsa-da, mazkur yig‘ilish bayonnomalarini imzolab tasdiqlaganlar.
Shuningdek, o‘rganish jarayonida “Bunyodkor” MChJning ta’sischisi Ulug‘bek Sharipovich Qurbanov Xorazm viloyati hokimining kapital qurilish kommunikatsiyalar, kommunal xo‘jalik va obodonlashtirish masalalari bo‘yicha o‘rinbosari, tender komissiyasi raisi Bahrom Sharipovich Qurbanovning yaqin qarindoshi, ya’ni tug‘ishgan ukasi ekanligi ma’lum bo‘ldi.
Bu holat esa “Davlat xaridlari to‘g‘risida”gi 472-sonli qonunining 5-, 19-, 39-moddalarida belgilangan talablarga ziddir.
Bundan tashqari, viloyat hokimligining 2020-yil 11-iyundagi 144-f son farmoyishiga ko‘ra sog‘liqni saqlash obyektlarini foydalanishga qabul qilish hududiy davlat komissiyasi tarkibida B.Sh.Qurbanov hududiy davlat qabul hay’ati raisi sifatida belgilangan.
Kelgusida Urganch shahridagi perinatal markazini rekonstruksiya qilish obyektida qurilish va ta’mirlash ishlari yakunlangach, mazkur obyektni foydalanishga qabul qilish jarayonida turli qonun buzilishlarining oldini olish maqsadida mazkur obyektni qabul qilishda B.Sh.Qurbanovni davlat qabul hay’ati raisi sifatida faoliyat yuritish masalasini ko‘rib chiqish maqsadga muvofiq.
Yuqorida qayd qilingan qonun buzilishi holatlariga yo‘l qo‘ygan Xorazm viloyati hokimining kapital qurilish, kommunikatsiyalar, kommunal xo‘jalik va obodonlashtirish masalalari bo‘yicha o‘rinbosari B.Qurbanov, Xorazm viloyati hokimligi yagona buyurtmachi injiniring kompaniyasi direktori Q.Rahimov va boshqalarning xatti-harakatlari yuzasidan Xorazm viloyati hokimligiga korrupsiyani keltirib chiqaruvchi sabab va shart-sharoitlarni bartaraf etish choralarini ko‘rish to‘g‘risida taqdimnoma kiritildi.
Shuningdek, Xorazm viloyati prokuraturasi ish yurituvidagi viloyat hokimligi yagona buyurtmachi injiniring kompaniyasi mansabdor shaxslarga nisbatan Jinoyat kodeksining 205-moddasi bilan qo‘zg‘atilib, tergov harakatlari olib borilayotgan jinoyat ishi tergovi jarayonida viloyat hokimi o‘rinbosari B.Qurbanov, Xorazm viloyati hokimligi yagona buyurtmachi injiniring kompaniyasi direktori Q.Rahimov va boshqalarning xatti-harakatlarini tergov yo‘li bilan tekshirib, qonuniy baho berish va tergov natijalari to‘g‘risida agentlikka axborot berish yuzasidan Xorazm viloyati prokuraturasiga so‘rovnoma yuborildi.
Holat yuzasidan kelgusida qo‘shimcha axborot taqdim etilishi ta’kidlandi.
Avvalroq Navoiyda bir necha mlrd so‘mlik davlat buyurtmalarini tender buyurtmachisi rahbari oilasiga tegishli korxona qo‘lga kiritgani, viloyatdagi ko‘plab qurilish ishlari amaldorlarga aloqador kompaniyalar tomonidan bajarilgani hamda bir necha yuz mlrd so‘mlik loyihalarni viloyat hokimi o‘rinbosarining qarindoshlari qo‘lga kiritgani ma’lum bo‘lgani haqida xabar berilgandi.
Izoh (0)