Gvatemalada mahalliy kuch vakillari va qo‘shni Gondurasdan kelgan muhojirlar o‘rtasida 17-yanvar kuni to‘qnashuvlar bo‘lib o‘tdi, deb yozadi Meduza.
Muhojirlar karvoni AQShga qarab harakatlanmoqda, u yerda esa bir necha kundan keyin amaldagi prezident Donald Trampning keskin immigratsiya siyosatini yumshatishga va’da bergan yangi prezident Jo Bayden o‘z lavozimiga kirishadi.
Hisob-kitoblarga ko‘ra, 9 ming kishidan iborat muhojirlar o‘tgan hafta oxirida Gonduras va Gvatemala o‘rtasidagi chegarani kesib o‘tgan edi. Gvatemala hukumati Gondurasni o‘z fuqarolarini to‘xtatishga chaqirdi va o‘z hududidagi “noqonuniy ommaviy ko‘chib yurishlar”ning oldini olishga va’da berdi.
Gvatemala politsiyasi xodimlari va harbiy xizmatchilar muhojirlar karvonini to‘xtatish uchun tayoqlar va ko‘zni yoshlantiruvchi gazdan foydalangan.
Gvatemala migratsiya xizmati rahbari Gilyermo Dias ma’lum qilishicha, Meksika chegarasiga olib boradigan yo‘lga 20 dan ortiq nazorat-o‘tkazish punktlari o‘rnatilgan.
“TASS” eslatishicha, 2020-yil oktabr boshida respublika hukumati, taxminan, 2 ming kishilik gonduraslik muhojirlar karvonini to‘xtatishga muvaffaq bo‘lgan. Shulardan 100 ga yaqinigina Meksika bilan chegaragacha yetib bora olgan.
Izoh (0)