Qashqadaryo viloyat Sog‘liqni saqlash boshqarmasi ijtimoiy tarmoqlarda Chiroqchi tumani markaziy shifoxonasida rentgen uskunasining asosiy qismi 29-dekabrdan buyon ishlamayotgani to‘g‘risida tarqalgan xabarlarga munosabat bildirdi, deb xabar beradi “Xalq so‘zi online”.
Ijtimoiy tarmoqlarda tarqalgan videoda viloyatning Chiroqchi tumanidagi markaziy poliklinikaning rentgen uskunasi ishlamayotgani to‘g‘risida so‘z boradi. Bunga mas’ul shifokor rentgen qurilmasi ishdan chiqqani to‘g‘risida rahbariyatni yozma ravishda xabardor qilganini ta’kidlagan.
Ma’lum bo‘lishicha, Chiroqchi tumani tibbiyot birlashmasi shoshilinch tibbiy yordam bo‘limi qabulxonasidagi rentgen uskunasi 2020-yil 29-dekabrdan buyon nosoz holatda. Elektr ta’minotidagi tez-tez uzilishlar sababli uskunaning dasturiy ta’minotida nosozliklar kuzatilgan. Uskuna ikki marta ta’mirlangan. “Biroq yana yuqoridagi sabab nosozlikni to‘liq bartaraf etish imkoni bo‘lmagan. Uskunani yana ta’mirlash choralari ko‘rilyapti”, — deyiladi xabarda.
Qayd etilishicha, ayni paytda tibbiyot birlashmasi hududida joylashgan ko‘p tarmoqli markaziy poliklinikadagi rentgen uskunasi doimiy ravishda ishlab turibdi.
Avvalroq Chiroqchida aholi e’tiroziga sabab bo‘lgan yaroqsiz simyog‘ochlar yangisiga almashtirilgani, shuningdek, Chiroqchi tumanida bir sutkada 16 soatgacha elektr energiyasi ta’minoti o‘chirilayotgani haqida xabar berilgandi.
Izoh (0)