Ijtimoiy tarmoqlarda maktabgacha ta’lim tashkiloti mudirasining tarbiyalanuvchini urayotgani aks etgan videolavha tarqaldi. Holat yuzasidan Samarqand viloyati prokuraturasi ma’lumot berdi.
Aniqlanishicha, voqea Samarqand viloyati Bulung‘ur tumanidagi 13-sonli MTMda sodir bo‘lgan. Hodisa yuzasidan hozirda Bulung‘ur tuman prokuraturasi tomonidan tergovga qadar tekshiruv harakatlari olib borilayotganligi ma’lum qilindi.
“Gazeta.uz”ning ma’lum qilinishicha, MTM mudirasi Rohatoy Ahrorova “Zamon” ko‘rsatuviga bergan intervyusida videolavhaga izoh berar ekan, o‘zini to‘g‘ri tuta olmaganini va qiziqqonlik qilganini ta’kidladi. U bolaning haqoratli so‘zlar aytganini ma’lum qilgan.
“Juda ham jahlim chiqdi. Chunki guruhda 30 ga yaqin bola bor edi. To‘g‘ri, urish mumkin emas, lekin muomala bilan qilsa, bolaning kelajagi nima bo‘ladi?” — dedi mudira.
Avvalroq Mirishkor tumanida chilim chekkan bog‘cha opalar videosi tarqalgani va ular ishdan olingani, Farg‘onada 2 tup chinor va bir tup tolni noqonuniy kestirgan bog‘cha mudirasiga 15 mln so‘m jarima yozilgani hamda Maktabgacha ta’lim vazirligi Andijonda ishini yo‘qotgan bog‘cha mudirasi o‘zini osib qo‘ygani yuzasidan rasmiy izoh bergani haqida xabar berilgandi.
Izoh (0)