Қашқадарё вилоят Соғлиқни сақлаш бошқармаси ижтимоий тармоқларда Чироқчи тумани марказий шифохонасида рентген ускунасининг асосий қисми 29 декабрдан буён ишламаётгани тўғрисида тарқалган хабарларга муносабат билдирди, деб хабар беради «Халқ сўзи online».
Ижтимоий тармоқларда тарқалган видеода вилоятнинг Чироқчи туманидаги марказий поликлиниканинг рентген ускунаси ишламаётгани тўғрисида сўз боради. Бунга масъул шифокор рентген қурилмаси ишдан чиққани тўғрисида раҳбариятни ёзма равишда хабардор қилганини таъкидлаган.
Маълум бўлишича, Чироқчи тумани тиббиёт бирлашмаси шошилинч тиббий ёрдам бўлими қабулхонасидаги рентген ускунаси 2020 йил 29 декабрдан буён носоз ҳолатда. Электр таъминотидаги тез-тез узилишлар сабабли ускунанинг дастурий таъминотида носозликлар кузатилган. Ускуна икки марта таъмирланган. «Бироқ яна юқоридаги сабаб носозликни тўлиқ бартараф этиш имкони бўлмаган. Ускунани яна таъмирлаш чоралари кўриляпти», — дейилади хабарда.
Қайд этилишича, айни пайтда тиббиёт бирлашмаси ҳудудида жойлашган кўп тармоқли марказий поликлиникадаги рентген ускунаси доимий равишда ишлаб турибди.
Аввалроқ Чироқчида аҳоли эътирозига сабаб бўлган яроқсиз симёғочлар янгисига алмаштирилгани, шунингдек, Чироқчи туманида бир суткада 16 соатгача электр энергияси таъминоти ўчирилаётгани ҳақида хабар берилганди.
Изоҳ (0)