Buxoro viloyat IIB tizimida faoliyat yurituvchi 20 nafar xodim salbiy xatti-harakati sabab 2020-yil xizmatdan bo‘shatilgan. Bu haqda viloyat IIB boshlig‘i Shuhrat Aliyev ishtirokidagi matbuot anjumanida ma’lum qilindi, deya xabar berdi “Daryo” muxbiri.
Ta’kidlanishicha, 2020-yil Buxoroda og‘ir tan jarohati yetkazish jinoyatlari 11 taga, nomusga tegish 6 taga, bosqinchilik holati 4 taga, talonchilik 2 taga, o‘g‘irlik 96 taga, bezorilik 33 taga, firibgarlik 367 taga, tovlamachilik 3 taga, transport vositasini olib qochish 1 taga, o‘rtacha og‘irlikdagi tan jarohati 63 taga, yengil tan jarohati yetkazish 129 taga ko‘payishiga yo‘l qo‘yilgan.
“Jinoyatchilikka qarshi kurashishning asosiy prinsipi sifatida faqatgina jinoyatning oqibatlari bilan kurashish emas, balki ularning barvaqt oldini olish masalasini ham qat’iy shakllantirish muhim. Buxoroda har bir profilaktika inspektoriga o‘rtacha 3425 nafar aholi to‘g‘ri keladi. Ayni kunlarda 83 nafar profilaktika inspektori ikki va undan ortiq mahallalarda xizmat qilmoqda. Shu bilan bir qatorda, kelgusida mahallalarda jinoyatchilikning oldini olishda hamda huquq-tartibotni ta’minlashda ommaviy axborot vositalari xodimlari bilan hamkorlikni kuchaytirishni maqsad qildik. Ular bilan tashkil etilgan ‘Tun’ va ‘Tungi guruhlar’da profilaktika tadbirlarini tashkil etsak, ancha ijobiy natijalarga erishgan bo‘lar edik”, — dedi Shuhrat Aliyev.
Boshqarma boshlig‘i matbuot anjumanida jurnalist va blogerlarni qiziqtirgan savollarga javob qaytarar ekan, tizimni nopok xodimlardan tozalash borasida amalga oshirilgan ishlar haqida ham gapirib, 20 nafar ichki ishlar xodimi salbiy asoslarga ko‘ra, ishdan bo‘shatilganini ochiqladi.
Eslatib o‘tamiz, avvalroq viloyatda sodir etilgan jinoyatlarning 3414 tasi profilaktika inspektorlari harakati bilan fosh etilgani xabar berilgandi.
Izoh (0)