Andijon viloyatining chegara hududlarida joylashgan harbiy qismlarda Davlat xizmatlari agentligining viloyat boshqarmasi tomonidan harbiylar va ularning oilalari uchun sayyor xizmatlar ko‘rsatilmoqda. Bu haqda “Daryo” muxbiri Umidjon Mamarasulov xabar berdi.
Ta’kidlanishicha, Paxtaobod tumanidagi harbiy qismlarda harbiylar va ularning oilalari uchun barcha qulayliklarga ega, zamonaviy texnika vositalari bilan jihozlangan maxsus avtobusda sayyor tartibda davlat xizmatlari ko‘rsatilgan.
Sayyor xizmat davomida harbiy xizmatchilarga Davlat xizmatlari markazi tomonidan ko‘rsatilayotgan xizmatlar, ulardan foydalanish tartiblari, yaratilgan qulayliklar haqida ma’lumotlar, shuningdek, elektron hukmatning afzalliklari, masofadan turib davlat xizmatlarini olish bo‘yicha ham tushunchalar berilgan. Bundan tashqari mutaxassislar harbiylarga qiziqarli va foydali bo‘lgan muhim huquqiy ma’lumotlar, xususan, notariat, davlat xizmatlari hamda fuqarolik holati dalolatnomalarini yozish sohalariga doir savollariga javob bergan.
Tadbirda qatnashgan 30 dan ortiq harbiy xizmatchilar va ularning oilalari o‘sha yerning o‘zida jismoniy shaxslar uchun soliq to‘lovchining identifikatsion raqamini (STIR) olish, farzandlarini davlat maktabgacha ta’lim muassasasiga qabul qilish uchun yo‘llanma, fuqarolarning nomida turar joy mavjud yoki yo‘qligi haqida ma’lumotnoma berilishi kabi xizmatlardan foydalangan.
“Markazimiz tomonidan bir kundan 150—200 nafar jismoniy va yuridik shaxslarga 150 dan ortiq xizmatlarni ko‘rsatamiz. Murojaat qilayotganlar orasida bir kunda o‘rtacha 4—5 ta harbiylar yoki ularning oilalarini ko‘rishimiz mumkin. Ular xizmatni o‘tayotgan harbiy qismlar esa markazdan 15—20 kilometr uzoqda joylashgan. Shu sababli ham ularda kelib ketish, navbat kutishda muammolar bo‘lishi tabiiy. Shularni inobatga olib harbiylarning talab va istaklaridan kelib chiqib, bundan buyon kamida bir oyda bir marotaba harbiy qismlarga chiqqan xolda davlat xizmatlarini ko‘rsatishni kelishib oldik”, — deydi markaz direktori Burhoniddin Usmonov.
Izoh (0)