Buxoro viloyatida sodir etilgan jinoyatlarning 3414 tasi mahalla fuqarolar yig‘inida faoliyat olib boruvchi profilaktika inspektorlari tomonidan fosh etilgan. Bu haqda viloyat IIB rahbari Shuhrat Aliyev ishtirokidagi matbuot anjumanida ma’lum qilindi, deya xabar berdi “Daryo” muxbiri.
Viloyat IIB boshlig‘ining ma’lumot berishicha, huquqbuzarliklar profilaktikasini tizimli tashkil etish maqsadida IIBdan olisda joylashgan aholi punktlarida 22 ta ichki ishlar bo‘limi va bo‘linmasi tashkil etilgan. Viloyatdagi 544 ta mahallaning har biriga profilaktika inspektori lavozimi joriy etilib, ularning soni 146 taga ortgan va 562 nafarga yetkazilgan. Natijada sodir etilgan 3570 ta jinoyatning 3414 tasi profilaktika inspektorlari tomonidan fosh etilgan.
Shuningdek, MFYlarda 560 ta jamoatchilik nazorat maskani tashkil etilib, ularda 2023 nafar “Fidokor yoshlar” guruhlarining patrullik xizmati yo‘lga qo‘yilgan. Sa’y-harakatlarga ko‘ra, qotillik 3 taga, o‘lim bilan bog‘liq yo‘l-transport hodisalari 14 taga, jamoat joyida sodir etilgan jinoyatlar 5 taga hamda guruh tarkibida jinoyat sodir etilishi 7 taga kamayishiga erishilgan.
“Biroq ochig‘ini aytish lozimki, hozirgi vaqtda jinoyatchilikka qarshi kurashda mahalla faollarining o‘rni sezilmayapti. Bu bevosita amalga oshirilgan ishlar qatorida hududlarda jinoyatlar sonining ortib, kamchiliklarning yuzaga kelishiga turtki bo‘ldi. Raqamlarga e’tibor qaratadigan bo‘lsak, 2020-yil mobaynida viloyatda jinoyatlar soni 2019-yilga nisbatan 850 taga, (2720/3570), jinoyat qidiruv sohasidagi jinoyatlar 682 taga (1684/2366) ko‘payishiga yo‘l qo‘yilgan. Yuqorida qayd etilgan 3570 ta jinoyatning 100 ming aholi soniga nisbati o‘rtacha 184 tadan to‘g‘ri kelib, bu ko‘rsatkich 2019 yilga nisbatan 42 taga (142/184) ko‘paydi”, — deydi viloyat IIB boshlig‘i.
Izoh (0)