Бухоро вилоят ИИБ тизимида фаолият юритувчи 20 нафар ходим салбий хатти-ҳаракати сабаб 2020 йил хизматдан бўшатилган. Бу ҳақда вилоят ИИБ бошлиғи Шуҳрат Алиев иштирокидаги матбуот анжуманида маълум қилинди, дея хабар берди «Дарё» мухбири.
Таъкидланишича, 2020 йил Бухорода оғир тан жароҳати етказиш жиноятлари 11 тага, номусга тегиш 6 тага, босқинчилик ҳолати 4 тага, талончилик 2 тага, ўғирлик 96 тага, безорилик 33 тага, фирибгарлик 367 тага, товламачилик 3 тага, транспорт воситасини олиб қочиш 1 тага, ўртача оғирликдаги тан жароҳати 63 тага, енгил тан жароҳати етказиш 129 тага кўпайишига йўл қўйилган.
«Жиноятчиликка қарши курашишнинг асосий принципи сифатида фақатгина жиноятнинг оқибатлари билан курашиш эмас, балки уларнинг барвақт олдини олиш масаласини ҳам қатъий шакллантириш муҳим. Бухорода ҳар бир профилактика инспекторига ўртача 3425 нафар аҳоли тўғри келади. Айни кунларда 83 нафар профилактика инспектори икки ва ундан ортиқ маҳаллаларда хизмат қилмоқда. Шу билан бир қаторда, келгусида маҳаллаларда жиноятчиликнинг олдини олишда ҳамда ҳуқуқ-тартиботни таъминлашда оммавий ахборот воситалари ходимлари билан ҳамкорликни кучайтиришни мақсад қилдик. Улар билан ташкил этилган ‘Тун’ ва ‘Тунги гуруҳларъда профилактика тадбирларини ташкил этсак, анча ижобий натижаларга эришган бўлар эдик», — деди Шуҳрат Алиев.
Бошқарма бошлиғи матбуот анжуманида журналист ва блогерларни қизиқтирган саволларга жавоб қайтарар экан, тизимни нопок ходимлардан тозалаш борасида амалга оширилган ишлар ҳақида ҳам гапириб, 20 нафар ички ишлар ходими салбий асосларга кўра, ишдан бўшатилганини очиқлади.
Эслатиб ўтамиз, аввалроқ вилоятда содир этилган жиноятларнинг 3414 таси профилактика инспекторлари ҳаракати билан фош этилгани хабар берилганди.
Изоҳ (0)