“YTHlarning 235 tasi tezlik oqibatida sodir etilgan”. Samarqandda 2020-yilda sodir bo‘lgan YTHlar tahlil qilindi

Samarqand viloyati hududida 2020-yil sodir etilgan yo‘l-transport hodisalari soni 2019-yilga nisbatan 64 taga kamaygan. Bu haqda “Daryo”ga viloyat IIB YXHB boshlig‘i o‘rinbosari Abdunabi To‘rayev ma’lum qildi.

Ta’kidlanishicha, 2019-yilda viloyatdagi YTHlar soni 857 tani tashkil qilgan bo‘lsa, 2020-yilda bu ko‘rsatkich 793 tani ko‘rsatgan.

“Tan jarohati bilan bog‘liq yo‘l transport hodisalari 46 taga (616—570), o‘lim bilan bog‘liq yo‘l-transport hodisalari 18 taga (241—223) kamayishiga erishilgan”, — deydi Abdunabi To‘rayev.

Tahlillarga ko‘ra, sodir etilgan yo‘l-transport hodisalarining 339 tasi piyodalarni urib yuborish, 241 tasi to‘qnashuv, 52 tasi ag‘darilish, 99 tasi velosipedchini urib yuborish, 44 tasi biror to‘siqqa borib urilish, 13 tasi boshqa turdagi yo‘l-transport hodisalarini tashkil etgan.
Yo‘l-transporti hodisalarining 97 tasi soat 00:00 dan 08:00 gacha, 289 tasi soat 08:00 dan 16:00 gacha, 402 tasi soat 16:00 dan 24:00 gacha bo‘lgan vaqt oralig‘ida sodir etilganligi qayd etilgan.

Aniqlanishicha, 2020-yil davomida sodir bo‘lgan yo‘l transport hodisalarining 235 tasi belgilangan tezlikka rioya qilmasdan transport vositasini boshqarish, 64 tasi piyodalar tomonidan qoidabuzarliklar sodir etilishi, 22 tasi mast holda transport vositasini boshqarish, 56 tasi yo‘nalishni o‘zgartirish, 44 tasi oraliq masofani saqlamaslik, 39 tasi charchoqlik tufayli rulda uxlab qolish, 80 tasi qarama-qarshi yo‘nalishga chiqib ketish oqibatida yuzaga kelgan. Mavzuga doir:

• Andijonda sodir bo‘lgan 668 ta YTHda 147 kishi vafot etgani ma’lum bo‘ldi
• O‘zbekistonda aynan “tonirovka” tufayli yuz bergan YTH ro‘yxatga olinmagan — IIV