Prezident Shavkat Mirziyoyev 15-yanvar, juma kuni Toshkent shahri va Yunusobod tumani faollari bilan uchrashuvda tumanning yangi hokimi Jahongir Ibrohimov haqida so‘z yuritdi.
“Daryo” muxbiri Mirolim Isajonovning xabar berishicha, davlat rahbari Jahongir Ibrohimovning Yunusobod tumaniga “yangi kuch” sifatida kelganini ta’kidladi.
“Ibrohimovni tajribasi bor, uni Sirdaryoda sinab kelganman, Bektemirda ham to‘rt oy ishladi. Bu ‘repetitsiya’ edi. Endi mana shu 352 ming aholisi bor tumanning hokimiga aylandi. U Sirdaryoning og‘ir kunlarida viloyat hokimining o‘rinbosari bo‘lib ishlab, tajriba orttirib qaytdi. Ibrohimov musofirchilikni ham ko‘rib keldi, u Toshkentning issiq suvlari, kottejlari, do‘konlari, farovon ko‘chalari, nurli chiroqlarini qadriga yetadi. Yunusobodga yangi kuch kelyapti va bu kerak edi. Uning nomzodi sessiyada tasdiqlandi. U endi aravani boshqacha olib, tumanni har jihatdan o‘zgartirishga kirishadi. Buning uchun hamma imkoniyat bor”, — dedi davlat rahbari.
Prezidentning ta’kidlashicha, agar Jahongir Ibrohimovga mahallaning “hidi” yoqmasa, u ishdan ketadi.
“Men Ibrohimovga yo Yunusobodda katta ishlarni qilasan yoki ishonchni oqlamaysan, degan masala qo‘ydim. Shuning uchun u ‘raskladushka’ bilan keldi tumanga. U ‘raskladushka’ni olib hokimiyatda yotmaydi, sektor mahallasida jamoasi bilan borib yotadi. Agar unga mahallaning ‘hidi’ yoqmasa, ketadi. Menga mahallaning ‘hidi’ yoqadi. Mahallaning ‘hidi’ bu — xalqning ovozi. Ana shunday ishlasa, xudo xohlasa, rejalarimiz, ko‘zlagan maqsadlarimiz joy-joyiga tushib, amalga oshadi, Yunusobod yanada ko‘rkamlashib, rivojlanadi”, — dedi Shavkat Mirziyoyev.
Izoh (0)