Ekologiya va atrof-muhitni muhofaza qilish davlat qo‘mitasi Toshkent markazidagi “Poytaxt” savdo markazi ro‘parasidagi qurilish maydonidagi daraxtlar kesilishi mumkinligi haqida ijtimoiy tarmoqlarda tarqalgan xabarlarga munosabat bildirdi.
“Gazeta.uz”ning yozishicha, jurnalist va blogerlar bog‘ning baland daraxtlar o‘sadigan qismi atrofi panjaralar bilan o‘rab olingani sababli daraxt kesilishi mumkinligidan xavotirga tusha boshlagan.
“Qurilish maydonidagi daraxtlarni kesishga Toshkent shahar ekologiya boshqarmasi tomonidan ruxsat berilmagan”, — deyiladi qo‘mita xabarida.
Qayd etilishicha, 15-yanvar kuni Davlat ekologiya qo‘mitasi nazorat inspeksiyasi tomonidan mazkur hududdagi 100 dan ortiq daraxtlar xatlovdan o‘tkazildi.
Eslatib o‘tamiz, 2020-yilning may oyida “Poytaxt” savdo markazi oldida joylashgan avtoturargoh o‘rnida to‘qqiz qavatli tijoriy bino qurilishi rejalashtirilgani ma’lum bo‘lgandi. Toshkent shahar hokimligi 2019-yilning martda 23 sotixli yer maydoni chexiyalik investor — IMP NEW PAY kompaniyasiga ajratib berilganini ma’lum qilgan. Jamoatchilik bundan bexabar bo‘lgan va avtoturargoh atrofida panjaralar o‘rnatilgani ular uchun kutilmagan hol bo‘ldi.
Izoh (0)