O‘zbekistonda “samosud”ni videoga olib internetda tarqatgan shaxs 22 million so‘mdan ortiq jarimaga tortiladi. Bu haqda IIV tergov departamenti bo‘lim boshlig‘i Azizbek Dolixo‘jayev ma’lum qildi.
“‘Samosud’ jarayonini videotasvirga olib, ijtimoiy tarmoqlarga joylashtirayotgan bo‘lsa, Jinoyat kodeksining 130 (prim)-moddasi, ya’ni zo‘ravonlik va yoki shafqatsizlikni targ‘ib qiluvchi ma’lumotlarni tayyorlash, uni tarqatish yoki joylashtirganlik uchun avvalambor ma’muriy javobgarlik nazarda tutilgan.
Bunda jismoniy shaxslarga 100 baravargacha miqdorda, ya’ni 22 million so‘mdan ziyod jarima jazosi qo‘llanishi, uning harakatlari jinoyatni keltirib chiqaradigan bo‘lsa, 3 yilgacha axloqni tuzatish ishlari jazosi nazarda tutilgan”, – deydi mutaxassis.
Avvalroq Andijonda qoidabuzar haydovchilarni suratga olib, YPXga jo‘natgan fuqaroni “samosud” qilganlar jarimaga tortilgani, Xorazmda bir guruh ayollarning boshqa bir ayolni yechintirib, jarayonni videoga olgani yuzasidan jinoyat ishi qo‘zg‘atilgani hamda Surxondaryoda “samosud” uyushtirib, janjal sodir etgan guruhga nisbatan jinoiy ish ochilgani haqida xabar qilingandi.
Izoh (0)