Prezident tomonidan“O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun imzolandi.
Qonun bilan Ma’muriy javobgarlik to‘g‘risidagi kodeks 175-8-modda bilan to‘ldirildi.
Unga muvofiq:
- davlat xaridlari rejalarini, shu jumladan reja-jadvallarini shakllantirish va joylashtirish tartibi bo‘yicha qonunchilik talablariga rioya etmaslik, davlat xaridlari to‘g‘risidagi qonunchilikda nazarda tutilgan hollarda davlat xaridlarini amalga oshirish chog‘ida maxsus axborot portaliga davlat xaridlari bo‘yicha e’lonlar joylashtirish tartibini, majburiy muhokama o‘tkazish tartibi va muddatlarini hamda davlat xaridi natijalarini joylashtirish muddatlarini buzish mansabdor shaxslarga BHMning 5 baravaridan 10 baravarigacha (1 million 115 ming so‘mdan 2 million 230 ming so‘mgacha) miqdorda;
- davlat xaridlari to‘g‘risidagi e’lonlarga va xarid hujjatlariga qonunchilikda taqiqlangan hamda raqobatni cheklovchi axborotni, havolalar va talablarni kiritish, xarid hujjatlarini tasdiqlash hamda buyurtmalarni shakllantirish tartiblarini buzish mansabdor shaxslarga BHMning 10 baravaridan 15 baravarigacha (2 million 230 ming so‘mdan 3 million 345 ming so‘mgacha) miqdorda;
- tovarlarni, ishlarni va xizmatlarni yetkazib beruvchilarni tender o‘tkazish yo‘li bilan aniqlash talablarini buzish mansabdor shaxslarga BHMning 15 baravaridan 20 baravarigacha (3 million 345 ming so‘mdan 4 million 460 ming so‘mgacha) miqdorda jarimaga tortilishiga olib keladi.
Ushbu qonun rasmiy e’lon qilingan kundan e’tiboran kuchga kiradi.
Avvalroq Korrupsiyaga qarshi kurashish agentligi davlat xaridlaridagi urug‘-aymoqchilik holatlari yuzasidan bayonot bergani, Xorazm viloyati hokimi o‘rinbosarining ukasiga tegishli kompaniya tenderda 20 mlrd so‘mlik davlat buyurtmasini yutgani hamda Jizzaxda bir necha yuz mlrd so‘mlik loyihalarni viloyat hokimi o‘rinbosarining qarindoshlari qo‘lga kiritgani haqida xabar berilgandi.
Izoh (0)