Toshkent viloyati Yangiyo‘l shahri hududidan o‘tuvchi ichimlik suvi quvurida yuzaga kelgan nosozlik sababli qator mahallalar ichimlik suvi ta’minotidan uzildi. Bu haqda “Toshkent suv ta’minoti” MChJ matbuot xizmati xabar bermoqda.
Xabarda aytilishicha, nosozlikni bartaraf etish maqsadida 12-yanvar, seshanba kuni soat 06:00 dan 20:00 ga qadar “Gulbahor” hamda “Niyozbosh” suv inshootlarida nasos agregati to‘xtatiladi.
Natijada Yangiyo‘l shahar “Farovon”, “Fayzli”, “Oltinobod”, “Turkiston”,“ Mustaqillik”, “Mevazor”, “Ramadon”, “Sabo”, “Navro‘z”, “Ishchilar shaharchasi”, “Olmos”, “Mezon”, “Yangibog‘, “Baxt” mahallalari hududida ichimlik suvi bosimi pastligi va uzilishlar, Yangiyo‘l tuman “Farovon”, “Guliston”, “Namuna”, “Binokor”, “Gulbog‘”, “Madaniyat”, “Paxta”, “Niyozbosh”, “O‘zbekiston”, “Qirsadoq” mahallalari hududida ichimlik suvi ta’minotida uzilishlar yuzaga keladi.
“Ushbu nosozliklar Yangiyo‘l shahar bo‘limi mas’ul xodimlari tomonidan bartaraf etilganidan so‘ng ichimlik suvi ta’minoti bir me’yorda uzatiladi”, — deyiladi xabarda.
Andijonda 9-yanvar kuni Xonobod—Andijon markaziy suv quvurining Andijon tumani “Xortum” mahallasida joylashgan suv taqsimlash jihozida nosozlik sababli, Namanganda 11-yanvar kuni “Paxtaliko‘l” suv uzatish inshootida favqulodda nosozlik sodir bo‘lganligi sababli ayrim hududlar ichimlik suvidan uzilgandi. Namanganda shu kunning o‘zidayoq ichimlik suvi uzatish qayta tiklandi. Andijon shahrining 30 foiziga esa suv berish boshlandi.
Avvalroq Qashqadaryoda elektr uzilishlari sababli suv ta’minoti to‘xtagani to‘g‘risida xabar berilgandi.
Izoh (0)