Тошкент вилояти Янгийўл шаҳри ҳудудидан ўтувчи ичимлик суви қувурида юзага келган носозлик сабабли қатор маҳаллалар ичимлик суви таъминотидан узилди. Бу ҳақда «Тошкент сув таъминоти» МЧЖ матбуот хизмати хабар бермоқда.
Хабарда айтилишича, носозликни бартараф этиш мақсадида 12 январь, сешанба куни соат 06:00 дан 20:00 га қадар «Гулбаҳор» ҳамда «Ниёзбош» сув иншоотларида насос агрегати тўхтатилади.
Натижада Янгийўл шаҳар «Фаровон», «Файзли», «Олтинобод», «Туркистон»,« Мустақиллик», «Мевазор», «Рамадон», «Сабо», «Наврўз», «Ишчилар шаҳарчаси», «Олмос», «Мезон», «Янгибоғ, «Бахт» маҳаллалари ҳудудида ичимлик суви босими пастлиги ва узилишлар, Янгийўл туман «Фаровон», «Гулистон», «Намуна», «Бинокор», «Гулбоғ», «Маданият», «Пахта», «Ниёзбош», «Ўзбекистон», «Қирсадоқ» маҳаллалари ҳудудида ичимлик суви таъминотида узилишлар юзага келади.
«Ушбу носозликлар Янгийўл шаҳар бўлими масъул ходимлари томонидан бартараф этилганидан сўнг ичимлик суви таъминоти бир меъёрда узатилади», — дейилади хабарда.
Андижонда 9 январь куни Хонобод—Андижон марказий сув қувурининг Андижон тумани «Хортум» маҳалласида жойлашган сув тақсимлаш жиҳозида носозлик сабабли, Наманганда 11 январь куни «Пахталикўл» сув узатиш иншоотида фавқулодда носозлик содир бўлганлиги сабабли айрим ҳудудлар ичимлик сувидан узилганди. Наманганда шу куннинг ўзидаёқ ичимлик суви узатиш қайта тикланди. Андижон шаҳрининг 30 фоизига эса сув бериш бошланди.
Аввалроқ Қашқадарёда электр узилишлари сабабли сув таъминоти тўхтагани тўғрисида хабар берилганди.
Изоҳ (0)