Turizmni rivojlantirish davlat qo‘mitasi “O‘zbekiston Respublikasida ziyorat turizmini yanada rivojlantirish va ziyoratchilar uchun qulay shart-sharoitlar yaratish chora-tadbirlari to‘g‘risida”gi Prezident farmoni loyihasini muhokamaga qo‘ydi.
Farmonga ilova qilingan uzoq xorij va qo‘shni respublikalardan xorijiy ziyoratchi sayyohlarni qabul qilish, ularga qulay shart-sharoitlar yaratish bo‘yicha “Yo‘l xaritasi”ga muvofiq, 2021-yildan boshlab transport-logistika xizmatlarini yaxshilash hamda rivojlantirish choralari ko‘riladi.
Xususan, o‘zbek diasporasi istiqomat qiladigan qo‘shni mamlakatlarning yirik shaharlari — O‘sh, Jalolobod, Turkiston, Chimkent, Dushanbe, Xo‘jand, Mozori-Sharifdan turizm salohiyati yuqori bo‘lgan shaharlarga avtobus marshrutlarini yo‘lga qo‘yish bo‘yicha muzokaralar o‘tkaziladi.
Shuningdek, O‘sh—Toshkent yo‘nalishini amalga oshirish uchun Tojikistonning Xo‘jand shahridan o‘tgan magistral yo‘lda harakatlanish bo‘yicha Tojikiston hukumati bilan kelishuvga erishish choralari ko‘riladi. Kelishuv natijasiga ko‘ra, xalqaro muntazam avtobus yo‘nalishi tashkil etilishi mumkin.
Ushbu tadbirlarni amalga oshirish bo‘yicha tashkiliy chora-tadbirlar 2021-yilda ishlab chiqilishi belgilangan. Ishlab chiqish va amalga oshirish uchun Turizmni rivojlantirish davlat qo‘mitasi, Transport vazirligi va Tashqi ishlar vazirligi mas’ul qilib belgilangan.
Eslatib o‘tamiz, 2019-yil fevralida Tojikiston orqali Jizzax va Sirdaryo viloyatlariga olib boradigan, 60 yil davomida yopiq turgan yo‘l ochilgan edi. Shu yilning martida o‘tkazilgan birinchi Markaziy Osiyo iqtisodiy forumi doirasida Farg‘ona vodiysida iqtisodiy yo‘lak ochilishi hamda Bishkek—Chimkent—Toshkent—Andijon—Xo‘jand—Jalolobod temiryo‘l tarmog‘ini qayta tiklash masalalari muhokama qilingandi.
Izoh (0)