Jizzaxda qulagan bino yonidagi inshoot ham xavfli holatda turgani ma’lum qilindi

Jizzax shahrining Mustaqillik ko‘chasida qurilayotgan ko‘p qavatli uyning bir qismi 10-yanvar kuni qulab tushgani to‘g‘risida xabar berilgandi. Zo‘r TV telekanalining “Bu kun” dasturi voqea joyidan lavha tayyorlab, holat yuzasidan olib borilayotgan ishlar to‘g‘risida ma’lumot berdi.

Jizzax shahar hokimi o‘rinbosari Rustam Husanovning so‘zlariga ko‘ra, dastlabki taxminlar bo‘yicha ko‘ngilsiz hodisa qurilish me’yori qoidalariga to‘liq amal qilinmaganligi sabab yuzaga kelgan.

“Yuqori qavatlarda og‘ir konstruksiyalar ishlatilib, pastki yuk ko‘taruvchi konstruksiyalarga zarar yetib, qulashga olib keltirgan”, — deydi Jizzax shahri bosh me’mori Vohidjon Mirzayev.

“Zilol” mahalla fuqarolar yig‘ini raisi Abduvali Normatovning so‘zlariga ko‘ra, bino xususiy tadbirkor tomonidan qurilayotgan bo‘lib, ishlar hali yakunlanmagan. Dekabr oxirlarida qurilish ishlari to‘xtatilgan. “Yangi yil arafasi bu yerda hech kim ishlamayotgan edi”, — deydi mahalla raisi.

“25-dekabrdan keyin ishlamagan, ishchilar ham bo‘lmagan, atrofida ham hech qanaqa harakatlar bo‘lmagan, fuqarolarga tan jarohati yetmagan, o‘lim holati yo‘q, — deya ta’kidlaydi shahar FVB boshlig‘i o‘rinbosari Munir Jumanov. Uning aytishicha, qidiruv-qutqaruv ishlari hali oxiriga yetmagan.

Mutaxassislarning ma’lum qilishicha, qulab tushgan bino yonidagi 6 qavatli inshootning ham poydevorlarida cho‘kish alomatlari kuzatilgan bo‘lib, hozirda u xavfli holatda turibdi.

“Ushbu binolar bir-biriga yonma-yon qurilgan bo‘lib, qulash jarayonida ikkinchi binoga ham zarar yetgan bo‘lishi mumkin. Ehtiyot chorasi sifatida fuqarolarning harakatlanishi hamda ularning hududdan o‘tishini vaqtincha to‘xtatib turibmiz”, — deydi FVB mas’uli.

Telekanal jurnalistlari bino qurilishi bilan shug‘ullangan “Chorvador-Qorako‘l-Baraka” MChJ vakillaridan holat bo‘yicha ma’lumot olishga uringan, ammo tadbirkor bu borada hech qanday izoh bermagan.

Jizzax shahar bosh me’morining bergan ma’lumotiga ko‘ra, tadbirkor qulagan binoning orqasidagi inshootni o‘zboshimchalik bilan noqonuniy qurib olgan.

Ta’kidlanishicha, “Chorvador-Qorako‘l-Baraka” MChJ rahbariga bir nechta savdo do‘konlari ham tegishli bo‘lib, u birinchi marotaba bu kabi qo‘p qavatli turar joy binosini qurish bilan shug‘ullangan.

“Bizdagi ma’lumotlarga ko‘ra, avval hech qanday ko‘p qavatli bino qurmagan”, — deydi shahar bosh me’mori.