AQSh prezidenti Donald Trampning akkauntlari bloklanganidan keyin Facebook’ning bozor kapitallashuvi 41 milliard AQSh dollariga, Twitter’niki esa 3 milliard AQSh dollariga kamaydi, deya xabar bermoqda “Kommersant”.
Facebook 7-yanvar kuni o‘z platformasida va Instagram’da amaldagi prezidentning postlariga cheklanmagan taqiq e’lon qilganidan beri NASDAQ birjasida ijtimoiy tarmoq aksiyalari 5,3 foizga arzonlashdi. Endi kompaniyaning bozor kapitallashuvi 731,56 milliard AQSh dollarini tashkil etadi.
Xuddi shunday qadamni qo‘ygan Twitter aksiyalari shu vaqt ichida o‘z qiymatining 7,74 foizini yo‘qotdi. Buning oqibatida kompaniyaning kapitallashuvi 38,3 milliard dollarga tushdi.
Trampning Facebook va Twitter’dagi akkauntlari AQShda kuchaygan siyosiy ziddiyatlar fonida bloklangandi. Ushbu ijtimoiy tarmoqlar rahbariyatining so‘zlariga ko‘ra, AQShning amaldagi prezidenti postlari platformalarning zo‘ravonlik harakatlarini qo‘zg‘atish to‘g‘risidagi qoidalarini buzgan.
Bundan tashqari, Snapchat va Twitch ham Trampning akkauntini bloklab qo‘ygan.
Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.
Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘lgani aytilmoqda.
Shundan so‘ng Facebook va Instagram Trampni 24 soatga, Twitter esa 12 soatga bloklab qo‘ydi. Keyinroq, 7-yanvar kuni AQSh Kongressi majlisini davom ettirib, Jo Bayden AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi.
Izoh (0)