АҚШ президенти Дональд Трампнинг аккаунтлари блокланганидан кейин Facebook’нинг бозор капиталлашуви 41 миллиард АҚШ долларига, Twitter’ники эса 3 миллиард АҚШ долларига камайди, дея хабар бермоқда «Коммерсантъ».
Facebook 7 январь куни ўз платформасида ва Instagram’да амалдаги президентнинг постларига чекланмаган тақиқ эълон қилганидан бери NASDAQ биржасида ижтимоий тармоқ акциялари 5,3 фоизга арзонлашди. Энди компаниянинг бозор капиталлашуви 731,56 миллиард АҚШ долларини ташкил этади.
Худди шундай қадамни қўйган Twitter акциялари шу вақт ичида ўз қийматининг 7,74 фоизини йўқотди. Бунинг оқибатида компаниянинг капиталлашуви 38,3 миллиард долларга тушди.
Трампнинг Facebook ва Twitter’даги аккаунтлари АҚШда кучайган сиёсий зиддиятлар фонида блокланганди. Ушбу ижтимоий тармоқлар раҳбариятининг сўзларига кўра, АҚШнинг амалдаги президенти постлари платформаларнинг зўравонлик ҳаракатларини қўзғатиш тўғрисидаги қоидаларини бузган.
Бундан ташқари, Snapchat ва Twitch ҳам Трампнинг аккаунтини блоклаб қўйган.
Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.
Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда тўрт киши ҳалок бўлгани айтилмоқда.
Шундан сўнг Facebook ва Instagram Трампни 24 соатга, Twitter эса 12 соатга блоклаб қўйди. Кейинроқ, 7 январь куни АҚШ Конгресси мажлисини давом эттириб, Жо Байден АҚШнинг 46-президенти этиб сайланганини тасдиқлади ва унинг инаугурациясини 20 январга белгилади.
Изоҳ (0)