AQShning amaldagi prezidenti Donald Trampning Twitter’dagi shaxsiy akkaunti — @realDonaldTrump zo‘ravonlikni yanada qo‘zg‘atish xavfi yuqori bo‘lgani sababli butunlay bloklandi. Bu haqda kompaniya blogida Vashington vaqti bilan 8-yanvar kechasi e’lon qilingan.

Foto: Los Angeles Times

Press-relizda Tramp 6-yanvar kuni Vashingtonda sodir bo‘lgan tartibsizliklar sabab 12 soatlik bloklanishdan so‘ng, yozgan oxirgi ikki tiviti matni batafsil o‘rganib chiqilgan bo‘lib, kompaniya uni zo‘ravonlikka chaqiriq deb hisoblagan. Masalan, Trampning saylangan prezident Jo Bayden inauguratsiyasida ishtirok etmasligi to‘g‘risidagi tvitini Twitter marosimga hujum amalga oshirilishiga shama deb hisoblagan, chunki amaldagi prezident unda ishtirok etmaydi.

Shuningdek, Twitter press-relizida ijtimoiy tarmoqning o‘zi va boshqa platformalarda yangi qurolli norozilik namoyishlarining, jumladan, 17-yanvar kuni Kapitoliy va boshqa hukumat binolariga hujumi rejasi tarqalmoqda. Twitter Trampdan tashqari, QAnon konspirologik harakatiga bog‘liq qator akkauntlarni ham bloklagan, jumladan, Trampning advokati Sidni Pauell va uning Milliy xavfsizlik bo‘yicha sobiq maslahatchisi Maykl Flinni ham.

Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.

Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘lgani aytilmoqda.

Shundan so‘ng Facebook va Instagram Trampni 24 soatga, Twitter esa 12 soatga bloklab qo‘ydi. Keyinroq 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi. Keyinroq Donald Tramp Facebook va Instagram’da prezidentlik muddati tugaguncha bloklandi.