Armaniston hukumati koronavirus infeksiyasining tarqalishi bilan bog‘liq vaziyat tufayli 11-yanvargacha joriy etilgan karantin choralarini 11-iyulgacha uzaytirdi, deya xabar bermoqda “RIA Novosti”.
Armanistonda karantin 11-sentabrda 6 oyga kiritilgan bo‘lib, endi u yana 6 oy — 11-iyulgacha davom etadi.
11-yanvar, dushanba kuni qabul qilingan qarorga binoan, chet elliklar Armanistonga borishdan ko‘pi bilan 72 soat oldin o‘tkazilgan PZR testlarining salbiy natijalariga ega bo‘lsa, ularga nafaqat havo yo‘li bilan, balki yerusti nazorat punktlari orqali kirishga ham ruxsat beriladi. Chet el fuqarolari, shuningdek, chegara bojxona postida koronavirusga test topshirishlari va o‘zlarini izolyatsiya qilib, uning natijalarini kutishi mumkin.
Bundan tashqari, ommaviy tadbirlarda qatnashuvchilar soni bo‘yicha cheklovlar ham olib tashlandi. Oldinroq bunday tadbirlarda 60 nafargacha ishtirokchilarga ruxsat berilgan edi. Shuningdek, yopiq hududlarda tadbirlar o‘tkazishga ham ruxsat beriladi.
Avvalroq Armaniston parlamenti koronavirus epidemiyasiga qarshi favqulodda holat rejimisiz karantin orqali kurashish mexanizmlarini ko‘zda tutuvchi qonunchilik paketini qabul qilgan edi. Qonun loyihasi karantin doirasida epidemiya hududida kirish va chiqishning alohida rejimini o‘rnatish, davlat chegarasi orqali qatnovlarni to‘xtatish yoki cheklash, fuqarolar va transport vositalarining erkin harakatlanishini cheklash, kuzatish, o‘z-o‘zini yakkalash va izolyatsiyaga ruxsat beradi.
Izoh (0)