Parijdagi Yelisey maydoni yirik rekonstruksiya ishlari doirasida “noodatiy bog‘”ga aylantiriladi. Bu haqda shahar meri Ann Idalgoga tayanib, The Guardian xabar bermoqda.
Uning so‘zlariga ko‘ra, markaziy prospektni o‘zgartirishga 250 million yevro sarflanadi. 1,9 kilometr uzunlikdagi ishlar Parijdagi 2024-yilgi yozgi Olimpiya o‘yinlaridan so‘ng boshlanadi.
“Afsonaviy xiyobon so‘nggi 30 yil ichida o‘z ko‘rkini yo‘qotdi. Parijliklar asta-sekin undan voz kechmoqda. Bir necha inqirozlar oqibatida qarovsiz qoldi”, — deyiladi ushbu prospekt va unga tutash hududlarni kapital ta’mirlash tashabbusini bildirgan Yelisey maydoni qo‘mitasi bayonotida.
Qo‘mita prezidenti Jan-Noel Reynxardt Yelisey maydoni dunyodagi eng chiroyli xiyobonlardan biri hisoblansa-da, fransuzlar uchun u “eskirgandek” ko‘rinishini 2019-yildayoq ta’kidlagan.
Qo‘mita xiyobonni obodonlashtirish bo‘yicha jamoatchilik muhokamalarini o‘tkazgan. Rejalar doirasiga avtomobillar maydonini ikki baravarga qisqartirish, ko‘chalarni piyodalar harakatlanishi uchun yashil maydonlarga aylantirish, havo tozaligini oshirish uchun daraxtlardan iborat tunnellar yaratish ham kiritilgan.
Yelisey maydonini rekonstruksiya qilish rejasi arxitektor Filipp Kyambaretta va uning PCA-Stream studiyasi tomonidan ishlab chiqilgan. Uning ta’kidlashicha, ta’mirlash ishlaridan so‘ng xiyobon “ekologik, inklyuziv va ko‘ngildagidek” bo‘lishi kerak.
Reja doirasida, shuningdek, prospektning janubi-sharqidagi mashhur Rozilik maydonini rekonstruksiya qilish ham ko‘zda tutilgan. Yelisey maydonidagi ishlarni 2030-yilgacha yakunlash rejalashtirilmoqda.
Izoh (0)