Туризмни ривожлантириш давлат қўмитаси «Ўзбекистон Республикасида зиёрат туризмини янада ривожлантириш ва зиёратчилар учун қулай шарт-шароитлар яратиш чора-тадбирлари тўғрисида»ги Президент фармони лойиҳасини муҳокамага қўйди.
Фармонга илова қилинган узоқ хориж ва қўшни республикалардан хорижий зиёратчи сайёҳларни қабул қилиш, уларга қулай шарт-шароитлар яратиш бўйича «Йўл харитаси»га мувофиқ, 2021 йилдан бошлаб транспорт-логистика хизматларини яхшилаш ҳамда ривожлантириш чоралари кўрилади.
Хусусан, ўзбек диаспораси истиқомат қиладиган қўшни мамлакатларнинг йирик шаҳарлари — Ўш, Жалолобод, Туркистон, Чимкент, Душанбе, Хўжанд, Мозори-Шарифдан туризм салоҳияти юқори бўлган шаҳарларга автобус маршрутларини йўлга қўйиш бўйича музокаралар ўтказилади.
Шунингдек, Ўш—Тошкент йўналишини амалга ошириш учун Тожикистоннинг Хўжанд шаҳридан ўтган магистрал йўлда ҳаракатланиш бўйича Тожикистон ҳукумати билан келишувга эришиш чоралари кўрилади. Келишув натижасига кўра, халқаро мунтазам автобус йўналиши ташкил этилиши мумкин.
Ушбу тадбирларни амалга ошириш бўйича ташкилий чора-тадбирлар 2021 йилда ишлаб чиқилиши белгиланган. Ишлаб чиқиш ва амалга ошириш учун Туризмни ривожлантириш давлат қўмитаси, Транспорт вазирлиги ва Ташқи ишлар вазирлиги масъул қилиб белгиланган.
Эслатиб ўтамиз, 2019 йил февралида Тожикистон орқали Жиззах ва Сирдарё вилоятларига олиб борадиган, 60 йил давомида ёпиқ турган йўл очилган эди. Шу йилнинг мартида ўтказилган биринчи Марказий Осиё иқтисодий форуми доирасида Фарғона водийсида иқтисодий йўлак очилиши ҳамда Бишкек—Чимкент—Тошкент—Андижон—Хўжанд—Жалолобод темир йўл тармоғини қайта тиклаш масалалари муҳокама қилинганди.
Изоҳ (0)