“Salkam 30 ming aholiga bir sutkada atigi 4 soat elektr energiya berilgan”. Qiymati 30 mlrd so‘m bo‘lgan podstansiyaga ehtiyoj sababi ma’lum qilindi

Qashqadaryoning Koson tumanidagi Rahim so‘fi mahallasida yashovchi aholiga 2017-yilda bir sutkada atigi to‘rt soat elektr energiyasi berilgan. Shu boisdan ham hududda 2018-yilda qiymati 30 milliard so‘mdan ortiq bo‘lgan podstansiya qurib, foydalanishga topshirilgan.

Bu haqda Qashqadaryo viloyat “Hududiy elektr tarmoqlari” korxonasi tomonidan jurnalist va blogerlar uchun tashkil etilgan press-turda ma’lum qilindi, deya xabar berdi “Daryo” muxbiri.

Ma’lum bo‘lishicha, press-turda jurnalist va blogerlar bilan suhbatlashgan Anvar Muzapov Koson tumanidagi qiymati 30 milliard so‘mdan ortiq bo‘lgan Turon 110\35 \10 podstansiyasining qurilishi sababini izohlagan.

“Ushbu hududdagi 11 ta mahallada yashovchi 29 mingdan ortiq aholi 2017-yilda bir sutkada atigi to‘rt soat elektr energiyasi iste’mol qilgan. Aholi shunga ham rozi bo‘lgan. Eng yomoni, mana shu to‘rt soatlik iste’mol davomida avariyali o‘chishlar ham kuzatilgan. Aholiga bu darajada kam elektr energiyasi berilishining sababi esa, mavjud podstansiya quvvati yetmagan. 2017-yilda rahbarlar aholi muammosini o‘rganib, hududda 30 milliard so‘mdan ortiq mablag‘ga zamonaviy podstansiya qurish kerak degan xulosaga kelgan. Va 2018-yilda nimstansiya qurilib, foydalanishga topshirilgan. Bugungi kunga kelib esa, hudud aholisi 24 soat elektr energiyasi bilan ta’minlanmoqda”, — deydi viloyat “Hududiy elektr tarmoqlari” korxonasi rahbari Anvar Muzapov.

Anvar Muzapovning ma’lumot berishicha, ayni kunda Qashqadaryo aholisining elektr energiyasiga bo‘lgan kunlik ehtiyoji 23 million MVtni tashkil qiladi.

“2021-yilning 8-yanvar kuni Tollimarjondagi avariya sabab viloyatimizda 8 ta tuman elektr energiyasidan uzilgan bo‘lishiga qaramasdan bir sutkada aholining elektr energiya iste’moli 19,5 million MVtni tashkil qildi. Holbuki, butun viloyatning bir sutkalik elektr energiya iste’moli 18 million MVt bo‘lishi belgilangan”, — deydi Anvar Muzapov.

Eslatib o‘tamiz, avvalroq “Tollimarjon” IESdagi navbatdagi avariya sabab Qashqadaryoning sakkiz hududi elektrdan to‘liq uzilgani, Energetika vaziri Alisher Sultonov esa viloyatga uchib ketgani haqida xabar berilgandi.