Қашқадарёнинг Косон туманидаги Раҳим сўфи маҳалласида яшовчи аҳолига 2017 йилда бир суткада атиги тўрт соат электр энергияси берилган. Шу боисдан ҳам ҳудудда 2018 йилда қиймати 30 миллиард сўмдан ортиқ бўлган подстанция қуриб, фойдаланишга топширилган.
Бу ҳақда Қашқадарё вилоят «Ҳудудий электр тармоқлари» корхонаси томонидан журналист ва блогерлар учун ташкил этилган пресс-турда маълум қилинди, дея хабар берди «Дарё» мухбири.
Маълум бўлишича, пресс-турда журналист ва блогерлар билан суҳбатлашган Анвар Музапов Косон туманидаги қиймати 30 миллиард сўмдан ортиқ бўлган Турон 11035 10 подстанциясининг қурилиши сабабини изоҳлаган.
«Ушбу ҳудуддаги 11 та маҳаллада яшовчи 29 мингдан ортиқ аҳоли 2017 йилда бир суткада атиги тўрт соат электр энергияси истеъмол қилган. Аҳоли шунга ҳам рози бўлган. Энг ёмони, мана шу тўрт соатлик истеъмол давомида аварияли ўчишлар ҳам кузатилган. Аҳолига бу даражада кам электр энергияси берилишининг сабаби эса, мавжуд подстанция қуввати етмаган. 2017 йилда раҳбарлар аҳоли муаммосини ўрганиб, ҳудудда 30 миллиард сўмдан ортиқ маблағга замонавий подстанция қуриш керак деган хулосага келган. Ва 2018 йилда нимстанция қурилиб, фойдаланишга топширилган. Бугунги кунга келиб эса, ҳудуд аҳолиси 24 соат электр энергияси билан таъминланмоқда», — дейди вилоят «Ҳудудий электр тармоқлари» корхонаси раҳбари Анвар Музапов.
Анвар Музаповнинг маълумот беришича, айни кунда Қашқадарё аҳолисининг электр энергиясига бўлган кунлик эҳтиёжи 23 миллион МВтни ташкил қилади.
«2021 йилнинг 8 январь куни Толлимаржондаги авария сабаб вилоятимизда 8 та туман электр энергиясидан узилган бўлишига қарамасдан бир суткада аҳолининг электр энергия истеъмоли 19,5 миллион МВтни ташкил қилди. Ҳолбуки, бутун вилоятнинг бир суткалик электр энергия истеъмоли 18 миллион МВт бўлиши белгиланган», — дейди Анвар Музапов.
Эслатиб ўтамиз, аввалроқ «Толлимаржон» ИЭСдаги навбатдаги авария сабаб Қашқадарёнинг саккиз ҳудуди электрдан тўлиқ узилгани, Энергетика вазири Алишер Султонов эса вилоятга учиб кетгани ҳақида хабар берилганди.
Изоҳ (0)