Toshkent shahar Shayxontohur tumanida bolalarga noqonuniy diniy ta’lim berish bilan birga ularni kaltaklagan shaxsga nisbatan jinoiy ish ochildi, deb xabar bermoqda UzReport-TV.
Qayd etilishicha, 2020-yil dekabr oyida Shayxontohur tumani “Janggoh” mahallasidagi ko‘p qavatli uylarning birida yashovchi A. ismli fuqaro o‘z yashash joyida noqonuniy tarzda hujra tashkil qilib, bolalarga diniy ta’lim bergani aniqlangan.
Islom ta’limotidan saboq bergan shaxsning ushbu faoliyatga ruxsati va ma’lumoti bo‘lmagan. Ayblanuvchi voyaga yetmagan bolalarga ta’lim berish jarayonida ularning tana a’zolariga oshxona o‘qlovi bilan urib, turli darajada jarohat yetkazgan.
Bolalarning ota-onalari diniy ta’lim uchun ayblanuvchi shaxsga 150-200 AQSh dollari berib turgan.
Holat yuzasidan Jinoyat kodeksining 105-moddasi (qasddan badanga o‘rta darajada shikast yetkazish) bilan jinoyat ishi qo‘zg‘atilib, tergov harakatlari olib borilmoqda.
Avvalroq O‘zbekiston fuqarolarini Suriyadagi terrorchilik tashkilotiga jo‘natishda gumon qilingan shaxs ushlangani, Samarqandda bolalarga noqonuniy diniy saboq berayotgan shaxs qo‘lga olingani hamda Toshkentdagi noqonuniy diniy maktablarda bolalar kaltaklanib kelingani aniqlangani haqida xabar berilgandi.
Izoh (0)