Қашқадарёдаги мавжуд 16 та тижорат банки ва уларнинг 60 та филиали коронавирус пандемияси даврида 990 миллиард сўм кредит пулларининг фоизини қайтаришни олти ой муддатга кечиктирган. Бу ҳақда Марказий банкнинг вилоят бош бошқармаси бошлиғи Файзулла Ражабов иштирокидаги матбуот анжуманида маълум қилинди, дея хабар берди «Дарё» мухбири.
Маълум бўлишича, 8 январь куни Қарши шаҳридаги Журналистлар уйида Марказий банкнинг вилоят бошқармаси масъуллари ва 16 та тижорат банкининг бошқарув раислари иштирокида матбуот анжумани ташкил этилган.
Матбуот анжуманида сўз олган Марказий банкнинг вилоят бош бошқармаси бошлиғи Файзулла Ражабов вилоятдаги мавжуд 16 та тижорат банки, уларнинг 60 та филиали ва 27 та мини банки томонидан 2020 йилда амалга оширилган ишлар ҳақида маълумот бериб, коронавирус пандемияси даврида банк мижозларининг қўллаб-қувватлангани ҳақида гапирган.
«Президентимиз берган топшириққа кўра, Марказий банк сиёсати орқали 235 минг нафар мижозга берилган салкам 1 триллион, аниқроқ қилиб айтадиган бўлсак 990 миллиард сўм кредит фоизларини тўлаш муддатини олти ойга кечиктирдик», — дейди Файзулла Ражабов.
Файзулла Ражабовнинг қўшимча қилишича, айни кунда вилоятда транспорт хизмати кўрсатувчиларнинг кредит қарздорликларини бартараф этиш муддатини ҳам 2021 йил якунига қадар узайтириш масаласи муҳокама қилинмоқда.
Эслатиб ўтамиз, Ўзбекистонда 2020 йил март ойида коронавирус пандемияси сабаб эълон қилинган карантин даврида жисмоний шахслар ва ЯТТларнинг кредит тўловларини қайтаришида 1 октябргача имтиёзли давр берилгани хабар қилинганди.
Изоҳ (0)