Surxondaryo viloyatida do‘kondan telefonlar o‘g‘irlagan shaxs ushlandi, deya xabar qilmoqda Tergov departamenti.
Qayd etilishicha, 2020-yilning 15-dekabr kuni 28 yoshli Botir Z. Sariosiyo tumani IIB boshlig‘iga ariza bilan murojaat qilgan.
Unda arizachi noma’lum shaxs Sariosiyo tumani “Mirzo Ulug‘bek” mahallasi hududida joylashgan “Qo‘zigul fayz” savdo majmuasida joylashgan telefon aksessuarlari do‘konidan 10 dona umumiy narxi 26 million 900 ming so‘mlik telefon apparatini o‘g‘irlab ketganligini, ushbu noma’lum shaxslarni aniqlab, ularga nisbatan qonuniy chora ko‘rishni hamda o‘ziga yetkazilgan moddiy zararni undirib berishni so‘ragan.
Mazkur murojaat yuzasidan 2020-yilning 16-dekabr kuni Sariosiyo tumani IIB huzuridagi Tergov bo‘linmasi tomonidan noma’lum shaxslarga nisbatan Jinoyat kodeksining 169-moddasi 2-qismi “g” bandi (uy-joy, omborxona yoki boshqa xonaga g‘ayriqonuniy ravishda kirib sodir etilgan o‘g‘rilik) bilan jinoyat ishi qo‘zg‘atilgan.
Jinoyat ishi yuzasidan olib borilgan tezkor qidiruv harakatlari natijasida ushbu jinoyatni Uzun tumanida yashovchi Dilovar A. sodir etganligi aniqlanib, uning yana bir qator tumanlarda shunga o‘xshash jinoyatlarni sodir etgani ma’lum bo‘lgan. O‘g‘irlangan 1 dona Samsung A 01 Core rusumli telefon apparatini Dilovar A. tanishiga berganligi aniqlanib, shu tanishidan ushbu telefon apparati tegishli tartibda rasmiylashtirib olingan.
Hozirda tergov harakatlari davom ettirilmoqda hamda o‘g‘irlangan telefon apparatlarini topish choralari ko‘rilmoqda.
Avvalroq Namanganda 15 yoshli bola do‘kondan 16 ta telefon o‘g‘irlagani aniqlangani, Navoiyda mahalladoshlarining chorva mollarini o‘g‘irlagan uch tadbirkor qo‘lga olingani hamda Buxoroda qo‘shnisining uyidan qiymati 8,5 million so‘mlik buyumlarni o‘g‘irlagan 17 yoshli qiz ushlangani haqida xabar berilgandi.
Izoh (0)