Toshkentning Yashnobod tumanida tanishlariga ko‘rsatgan karate usuli muvaffaqiyatsiz yakunlangan 31 yoshli ayol pichoqlandi. Bu haqda IIV Tergov departamenti xabar berdi.
Xabarga ko‘ra, 2020-yilning 23-dekabr kuni soat 09:03 da Yashnobod tumani Sandiqli 1-tor ko‘chasi 2-uy oldida tan jarohatlari bilan noma’lum ayolning murdasi topilgan. Olib borilgan tergovga qadar tekshiruv harakatlari natijasida murdaning shaxsi aniqlanib, u 31 yoshli Darya K. ekanligi aniqlangan.
Ma’lum bo‘lishicha, 22-dekabr kuni soat 16:30 larda Darya K. tanishlari Aleksandr K. va Vladimir A. bilan Aleksandr K.ga tegishli Sultonali Mashhadiy ko‘chasida joylashgan uylardan birida tibbiyot spirtini iste’mol qilishgan. So‘ngra Darya K. mast holatda bo‘la turib, Vladimir A.ga karate usullarini ko‘rsatishni boshlagan. Shu vaqtda u Vladimir A.ga bexosdan jarohat yetkazgan. Vladimir A. bundan jahli chiqib, yonida bo‘lgan oshxona pichog‘i bilan ikki marotaba ayolning ko‘krak qismiga jarohat yetkazgan. Natijada ayol tan jarohatlari bilan xonadondan chiqib ketgan va yuqorida ko‘rsatilgan joyda xushini yo‘qotib, vafot etgan.
Holat yuzasidan Toshkent shahar Yashnobod tumani IIO FMB huzuridagi Tergov bo‘linmasi tomonidan Vladimir A.ga nisbatan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan.
Jinoyat ishi doirasida hodisa sodir bo‘lgan joydan oshxona pichog‘i ashyoviy dalil tariqasida rasmiylashtirib olingan.
Hozirda Vladimir A. jinoyat ishiga ayblanuvchi tariqasida ishtirok etishga jalb qilinib, unga nisbatan qamoqqa olish tariqasidagi ehtiyot chorasi qo‘llanilgan. Jinoyat ishi yuzasidan dastlabki tergov davom etmoqda.
Izoh (0)