Smart Medical Pharm ва Billur Medical Trade 50 миллилитрлик 70 фоизлик этил спирти ҳамда «Меновазин» маҳсулотларини ноқонуний равишда ишлаб чиқараётгани аниқланди. Бу ҳақда Фармацевтика тармоғини ривожлантириш агентлиги маълум қилди.
Агентлик маълумотларига кўра, айрим фуқаролар Smart Medical Pharm ва Billur Medical Trade компанияларига тегишли дори воситалари сифатидан норози эканини билдирган. Аниқланишича, улар дори воситаларини ишлаб чиқариш ҳуқуқига эга бўлган лицензиатлар реестрига киритилмаган.
Фармацевтика тармоғини ривожлантириш агентлиги дорихоналарни Ўзбекистонда рўйхатдан ўтказилмаган, сифатсиз, қалбакилаштирилган дори воситаларини ва тиббий буюмларни, шунингдек, мамлакатда рўйхатдан ўтказилган дори воситаларининг ғайриқонуний нусхаларини сақлаш ва (ёки) реализация қилишга йўл қўймаслиги, ушбу ҳолатлар лицензия талаблари ва шартларини қўпол равишда бузилиши экани ҳақида огоҳлантиради. Акс ҳолат эса лицензиянинг амал қилиши белгиланган тартибда тўхтатилишига олиб келиши мумкин.
Ушбу корхоналарнинг ноқонуний фаолияти юзасидан Бош прокуратура ҳузуридаги Иқтисодий жиноятларга қарши курашиш департаментига мурожаатнома юборилган.
Аввалроқ Интеллектуал мулк агентлиги «Тримол» дори воситасини ишлаб чиқарувчи Ҳиндистоннинг Ajanta Pharma Ltd компаниясининг ҳуқуқларини ҳимоя қилгани, «Турмол» таблеткаларини ишлаб чиқараётган наманганлик тадбиркорлар жаримага тортилгани тўғрисида хабар берилганди.
Изоҳ (0)