Futbol klublari o‘rtasida Jahon chempionatida qo‘shimcha almashtirishlarga ruxsat berish qoidasi sinovdan o‘tkaziladi. Bu haqda FIFA rasmiy saytida ma’lum qilindi.
Gap miya chayqalishida gumon qilingan o‘yinchini almashtirishga ruxsat berish haqida ketmoqda. Agar biror o‘yinchida miya chayqalishi kuzatilsa yoki shunga gumon paydo bo‘lsa, ishlatib bo‘lingan imkoniyatlardan qat’i nazar yana bitta almashtirishga ruxsat etiladi. Jamoalar bu imkoniyatdan o‘yin davomida faqat bir marta foydalanishi mumkin.
Shu tariqa ushbu qoida klublar o‘rtasidagi 2020-yilgi Jahon chempionatida ilk bor sinovdan o‘tkaziladi. Musobaqa 2021-yilning 1—11-fevral kunlari Qatarda bo‘lib o‘tadi. Uning amaldagi chempioni “Liverpul” hisoblanadi.
Eslatib o‘tamiz, aslida musobaqa 2020-yilning dekabr oyida bo‘lib o‘tishi rejalashtirilgan, biroq koronavirus sabab qoldirilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)