Ispaniya La Ligasi 18-turidan o‘rin olgan “Atletiko” va “Atletik Bilbao” jamoalari o‘rtasidagi uchrashuv qoldirildi. Bu haqda har ikki klubning matbuot xizmatlari va La Liga ma’lum qildi.
Bunga sabab qilib Madriddagi noqulay ob-havo sharoiti ko‘rsatilgan. 8-yanvar kuni bilbaoliklar klubi vakillarini Madridga olib kelgan samolyot aeroportga qo‘na olmagan va Bilbaoga qaytib ketgandi.
Shtorm sabab Ispaniyaning ayrim joylarida qor bo‘ronlari kuzatilmoqda. Ma’lum bo‘lishicha, kun davomida Madriddagi aeroport yopiq bo‘ladi. Shu sabablar va maydon o‘ynab bo‘lmas darajaga kelgani bois har ikki tomon uchrashuvni qoldirishga qaror qilgan hamda bu borada La Ligaga iltimosnoma yuborgan. La Liganing musobaqalar o‘tkazish bo‘limi o‘yinni qoldirishga ruxsat bergan.
Madriddagi yog‘ingarchilik miqdori 20 santimetrgacha borishi kutilmoqda. Shaharda trevoganing qizil darajasi e’lon qilingan.
O‘yin 9-yanvar kuni mahalliy vaqt bilan 16:15 da (Toshkent vaqti bilan 20:15) boshlanishi rejalashtirilgandi. O‘yinning yangi sanasi keyinroq e’lon qilinishi aytilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)