20 январь — Ўзбекистондаги коллеж ва техникумларга контракт асосида ўқишга кирган ўқувчиларга тўловнинг камида 50 фоизини тўлаш учун охирги кун этиб белгиланди. Бу ҳақда Олий ва ўрта махсус таълим вазирлиги матбуот хизмати хабар берди.
Эслатиб ўтамиз, техникумларга ҳужжатларни қабул қилиш бошлангани ҳақида Олий ва ўрта-махсус таълим вазирлиги 2020 йил август ойининг охирида маълум қилганди. Ўзбекистондаги коллежларга қабул квоталари эса сентябрь ойининг бошида тасдиқланганди. 2020/2021-ўқув йили Ўзбекистонда янгича тизимдаги ўрта махсус таълимнинг илк йили саналади.
Жами 201 та коллеж ва 185 та техникумга кириш имтиҳонлари 20—30 ноябрь кунлари бўлиб ўтган. Имтиҳон натижалари 17 декабрь куни эълон қилинган.
2021 йил коллеж ва техникумларга умумий 154 765 ўқувчини қабул қилиш режалаштирилган. Шулардан 86 фоизи тўлов-контракт асосида ўқийди.
Октябрь ойида контракт миқдори таълим йўналишига қараб йилига 3,9—4,2 миллион сўм бўлиши эълон қилинган. Контракт суммаси меҳнатга ҳақ тўлашнинг энг кам миқдорига нисбатан белгиланган.
Изоҳ (0)