2019-yil 18-oktabr kuni Scaling Solar 1 loyihasi doirasida Navoiy viloyatida quvvati 100 MVt bo‘lgan FES qurilishi bo‘yicha o‘tkazilgan tenderda Masdar (BAA) kompaniyasi g‘olib bo‘lgan edi. Kompaniya viloyatda birinchi fotoelektrostansiyani qurishni boshladi, deb xabar beradi O‘zbekiston Energetika vazirligi.
Stansiya quyosh energiyasidan yiliga 270 gigavatt-soat elektr energiyasini ishlab chiqaradi, bu 31 mingdan ortiq xonadonni elektr bilan ta’minlash uchun yetarli. Shuningdek, u yiliga havoga chiqadigan parnik gazlarining 156 ming metr tonnagacha kamayishiga xizmat qiladi.
Vazirlik matbuotining ma’lum qilishicha, yanvar oyida Masdar qurilish ishlariga kirishgan. FESni ishga tushirish 2021-yilning oktabr oyiga rejalashtirilgan.
Xalqaro moliya korporatsiyasi (IFC) va Osiyo taraqqiyot banki loyihani moliyalashtirishga 60 million dollargacha mablag‘ ajratadi. Stansiya qayta tiklanadigan elektr manbaiga asoslangan sanoat ko‘lamidagi birinchi elektrostansiyaga aylanadi.
FES nega kerak?
Hozirda O‘zbekiston o‘zining 85 foiz elektr energiyasini issiqlik elektr stansiyalari yordamida ishlab chiqarmoqda. Spot’ning yozishicha, quyosh energetikasi yordamida mamlakat tabiiy gaz va ko‘mirga bo‘lgan qaramligini kamaytirishi mumkin.
Shuningdek, stansiya qayta tiklanadigan energiya manbalaridan foydalanish imkoniyatlarini oshirishga xizmat qiladi va elektr energiyasi ishlab chiqarishga salmoqli hissa qo‘shadi. Prognozlarga ko‘ra, 2030-yilga borib butun mamlakat bo‘ylab elektr energiyasiga bo‘lgan talab 103 ming gigavatt-soatga qadar oshadi.
“O‘zbekistondagi ilg‘or amaliyot namunasiga aylanadigan ushbu loyiha ulkan ijobiy ta’sirga ega bo‘ladi. U xususiy sarmoyalar uchun yangi bozorlarni ochadi va qayta tiklanadigan energiya ishlab chiqarishni ko‘paytirish bo‘yicha mamlakat rejalarini amalga oshirishda yordam beradi”, — deydi IFC’ning Yevropa va Markaziy Osiyo bo‘yicha direktori Vibke Shlyomer.
Izoh (0)