2019 йил 18 октябрь куни Scaling Solar 1 лойиҳаси доирасида Навоий вилоятида қуввати 100 МВт бўлган ФЭС қурилиши бўйича ўтказилган тендерда Masdar (БАА) компанияси ғолиб бўлган эди. Компания вилоятда биринчи фотоэлектростанцияни қуришни бошлади, деб хабар беради Ўзбекистон Энергетика вазирлиги.
Станция қуёш энергиясидан йилига 270 гигаватт-соат электр энергиясини ишлаб чиқаради, бу 31 мингдан ортиқ хонадонни электр билан таъминлаш учун етарли. Шунингдек, у йилига ҳавога чиқадиган парник газларининг 156 минг метр тоннагача камайишига хизмат қилади.
Вазирлик матбуотининг маълум қилишича, январь ойида Masdar қурилиш ишларига киришган. ФЭСни ишга тушириш 2021 йилнинг октябрь ойига режалаштирилган.
Халқаро молия корпорацияси (IFC) ва Осиё тараққиёт банки лойиҳани молиялаштиришга 60 миллион долларгача маблағ ажратади. Станция қайта тикланадиган электр манбаига асосланган саноат кўламидаги биринчи электростанцияга айланади.
ФЭС нега керак?
Ҳозирда Ўзбекистон ўзининг 85 фоиз электр энергиясини иссиқлик электр станциялари ёрдамида ишлаб чиқармоқда. Spot’нинг ёзишича, қуёш энергетикаси ёрдамида мамлакат табиий газ ва кўмирга бўлган қарамлигини камайтириши мумкин.
Шунингдек, станция қайта тикланадиган энергия манбаларидан фойдаланиш имкониятларини оширишга хизмат қилади ва электр энергияси ишлаб чиқаришга салмоқли ҳисса қўшади. Прогнозларга кўра, 2030 йилга бориб бутун мамлакат бўйлаб электр энергиясига бўлган талаб 103 минг гигаватт-соатга қадар ошади.
«Ўзбекистондаги илғор амалиёт намунасига айланадиган ушбу лойиҳа улкан ижобий таъсирга эга бўлади. У хусусий сармоялар учун янги бозорларни очади ва қайта тикланадиган энергия ишлаб чиқаришни кўпайтириш бўйича мамлакат режаларини амалга оширишда ёрдам беради», — дейди IFC’нинг Европа ва Марказий Осиё бўйича директори Вибке Шлёмер.
Изоҳ (0)